У сельгаспрадпрыемствах раёна распачалася сяўба ранніх яравых культур

У ААТ “Бялынічы” магутная тэхніка выйшла на палі яшчэ ў мінулую суботу. Першым у пульхную раллю адправіўся авёс. Яго літаральна за некалькі дзён пасеялі на 105 гектарах, як і планавалася. Зараз чарга дайшла да ячменя. Каля Вялікага   Кудзіна магутныя трактары “Беларусы”-1221 і -2022 пад кіраўніцтвам Васіля ЦЕЛЬМАНКОВА і Дзмітрыя ЧАЙКОЎСКАГА рыхтавалі глебу да сяўбы. Следам за імі на энерганасычаным трактары “Беларус”-3022 з пасяўным агрэгатам АКПМ-6 кіруецца Дзмітрый КІРЫЛЕНКА. Дзённая норма для механізатара – пасеяць 25 гектараў, аднак ён перавыконвае яе амаль што ўдвая. Уважліва сочыць за ходам вясенне-палявых работ малады спецыяліст, аграном Віталь КЛІМАЎЦОЎ, які ў мінулым годзе скончыў БСГА. Гэтая пасяўная для яго другая па ліку.

— Я правяраю сеялку пасля кожнай загрузкі, уважліва сачу за тым, каб не забіваліся адтуліны, праз якія зерне патрапляе ў зямлю, кантралюю якасць ворыва, — гаворыць Віталь. — Увогуле, зараз пачалася самая напружаная пара, але часовыя складанасці мяне не палохаюць. І надвор’е спрыяе нашай працы.

Виталик

Сеялка

— Агульная плошча пад сяўбу ячменя складае 900 гектараў, — інфармуе журналіста галоўны аграном ААТ “Бялынічы” Раман КАЛЫВАНАЎ. — Пасля будзем сеяць яравую пшаніцу, лён, аднагадовыя зернебабовыя культуры і кукурузу. Гэта яшчэ больш за 2000 гектараў. Паралельна з правядзеннем сяўбы ў гаспадарцы пачалі падкормліваць азотнымі ўгнаеннямі азімыя культуры. Занятыя на гэтых работах Аляксандр КАПЫТКОЎ і Аляксандр САСНОЎСКІ штодзень удвух апрацоўваюць больш за 100 гектараў азіміны.

Святлана МАГІЛЕЎЧЫК.

Фота аўтара.

Print Friendly, PDF & Email

Добавить комментарий

Ваш адрес email не будет опубликован. Обязательные поля помечены *