Увага бяспецы дзяцей

Пройдзе зусім няшмат часу, і ў мінулым застануцца цёплыя летнія дні. З вялікімі букетамі кветак пойдуць у школу першакласнікі, каб даведацца шмат новага, цікавага і карыснага. Да педагогаў напярэдадні новага навучальнага года далучаюцца ратавальнікі, якія звяртаюць увагу дарослых на праблему дзіцячага свавольства з агнём.

Толькі асабісты прыклад бацькоў, старэйшых сясцёр і братоў лепш за іншых навучыць дзяцей неабходнасці быць уважлівымі з агнём.

З 20 жніўня ў раёне стартавала акцыя МНС “У цэнтры ўвагі – ДЗЕЦІ!”. Яе мэта –  прыцягнуць увагу да праблемы траўматызму і гібелі дзяцей ад пажараў. Прадоўжыцца яна да 21 верасня і будзе праходзіць у тры этапы.

Першы прымеркаваны да Дня ведаў. Да 31 жніўня акцыя будзе праходзіць у магазіне “Тавары для дзяцей”. З бацькамі і дзецьмі ратавальнікі паразмаўляюць на тэму папярэджання надзвычайных сітуацый, нагадаюць прычыны іх узнікнення, раскажуць, як правільна сябе паводзіць, каб захаваць жыццё і здароўе, і ўручаць падарункі да школы ад МНС: сшыткі, размалёўкі, брашуры, памяткі з парадамі.

Другі этап, які пройдзе з 1 па 14 верасня, будзе ўключаць прафілактычныя гутаркі на школьных лінейках і класных гадзінах. Работнікі МНС раскажуць дзецям, як паводзіць сябе ў экстрэмальных сітуацыях, пакажуць тэматычныя відэа і мультфільмы, замацуюць веды ў цікавых конкурсах і віктарынах. Ратавальнікі паразмаўляюць і з настаўнікамі, а таксама правядуць у школах вучэбную эвакуацыю.

Падчас заключнага этапа, 17-21 верасня, работнікі МНС наведаюць дашкольныя ўстановы. Для дзяцей падрыхтуюць тэатралізаваныя паказы, пакажуць мультфільмы і ў гульнёвай форме раскажуць пра бяспеку. Не забудуць і на бацькоў з педагогамі: з імі ратавальнікі пагутараць падчас лекцый і спецыяльных інструктажоў.

Кацярына ЛЮБІВАЯ,

інспектар ГПіУГ РАНС.

 

Print Friendly, PDF & Email

Добавить комментарий

Ваш адрес email не будет опубликован. Обязательные поля помечены *