У роднай школе і сцены дапамагаюць

У гэтым пераканана настаўнік замежных моў СШ № 1 імя М. І. Пашкоўскага Вольга МАЗУРАВА, якая пасля атрымання ў чэрвені мінулага года дыплома аб вышэйшай адукацыі вярнулася працаваць на малую радзіму. Дый яшчэ ў родную школу.

У свой час вопытныя настаўнікі, якія тут працуюць, паўплывалі на выбар прафесіі Вольгі. Сярод іх настаўнік замежных моў Зоя СКУГАРАВА.

– Зоя Іванаўна ўбачыла ў мяне задаткі, здольнасці, дапамагала мне іх развіваць, падтрымлівала маральна, верыла і паўтарала, што я ўсё змагу, нават у тыя моманты, калі сама ў сабе сумнявалася, – расказала Вольга Мазурава.

Дасканалае вывучэнне англійскай мовы, як сцвярджае маладая настаўніца, прадастаўляе сёння шмат магчымасцяў і дае вялікія перспектывы: падарожнічаць, мець зносіны з замежнікамі, чытаць, глядзець новыя фільмы на мове арыгінала.

– Лічу, што замежная мова як ключ, што можа адкрыць зачыненыя дзверы, – адзначыла настаўніца.

З выбарам прафесіі яна не пралічылася, як і з першым месцам працы. Калектыў школы, у якой сама настаўніца правучылася адзінаццаць гадоў, добра прыняў маладога педагога. Тым больш, што практычна ўсіх калег яна ўжо ведала.

– Вельмі абрадавалася, калі на размеркаванні ва ўніверсітэце даведалася пра вакансію ў роднай школе, – успамінае Вольга Мазурава. – З калегамі, якія яшчэ некалькі гадоў таму былі маімі настаўнікамі, адносіны ў нас добрыя. Улічваючы тое, што тэорыі ў педагогіцы ў мяне было больш, чым практыкі, час ад часу звяртаюся па дапамогу да іх. А яны, у сваю чаргу, рады падказаць.

Дзякуючы такой падтрымцы, Вольга Ігараўна не стала сумнявацца ў сваім выбары і ў той момант, калі ёй прапанавалі ўзяць класнае кіраўніцтва. Яна адразу пагадзілася. Так з першага года працы яна стала класным кіраўніком пяцікласнікаў.

Яшчэ адзін “плюс”, на думку Вольгі Мазуравай, у тым, што жыве яна з бацькамі, якія пасля насычанага працоўнага дня выслухаюць, падтрымаюць і дадуць параду.

– Таму знаёмым выпускнікам вышэйшых і сярэдніх навучальных устаноў раю, па магчымасці, пачынаць сваю кар’еру ў родным паселішчы, – падкрэсліла Вольга Мазурава. – Тут, як кажуць, і сцены дапамагаюць.

Марыя ШУТ.

Фота аўтара.

Print Friendly, PDF & Email