Па 30 красавіка на Магілёўшчыне праводзіцца месячнік па добраўпарадкаванні тэрыторый, навядзенні чысціні і парадку.

Прадаўжаюць наводзіць санітарны парадак на роднай зямлі і бялынічане. Яны займаюцца ачысткай, добраўпарадкаваннем тэрыторый  вытворчых, населеных пунктаў, двароў, вуліц, паркаў, зон адпачынку, аб’ектаў сацыяльна-бытавога і культурнага прызначэння, мемарыяльных комплексаў, месц баявой і воінскай славы…

Працы хапае ўсім, а лішніх рук, як вядома, ніколі не бывае.

Навядзем чысціню разам, і кожнаму з нас не сорамна будзе гасцей запрашаць.

Да актыўнага ўдзелу ў мерапрыемствах месячніка чысціні, суботніках, навядзенні парадку на зямлі запрашаюцца ўсе працоўныя калектывы, насельніцтва раёна, дэпутаты, органы тэрытарыяльнага грамадскага самакіравання, грамадскія аб’яднанні.

У мінулую суботу прайшоў чарговы суботнік па навядзенні парадку на роднай зямлі.

Раённы штаб па навядзенні парадку распрацаваў план асноўных мерапрыемстваў па добраўпарадкаванні і навядзенні парадку ў горадзе і населеных пунктах, на вытворчых аб’ектах прадпрыемстваў, устаноў і арганізацый, якія неабходна выканаць за час правядзення месячніка, вызначыўшы пры гэтым кожны чацвер яшчэ і адзіным санітарным днём.

Як мы ўсе добра ведаем і бачым, пасля зімы на вытворчых тэрыторыях і вакол іх, на прысядзібных участках, узбоч дарог і вуліц застаецца шмат таго, што ніколькі не дадае ім эстэтыкі. І сведчыць пра нашу, мякка кажучы, побытавую абыякавасць. Значыць, патрэбна вялікая ўборка з удзелам кожнага. Усе мы павінны праяўляць клопат не толькі адносна чысціні ў сваіх кватэрах, але і аб навакольным асяроддзі, у якім жывём, абавязаны непакоіцца. Таму адна з галоўных задач месячніка па добраўпарадкаванні тэрыторый палягае ў тым, каб навесці ўзорны парадак на зямлі, на вытворчых тэрыторыях і вакол іх, у населеных пунктах, месцах агульнага выкарыстання.

У мінулую суботу наводзіўся парадак на замацаваных за арганізацыямі, установамі і прадпрыемствамі тэрыторыях як у горадзе, так і ў населеных пунктах.

Асабліва шматколькасны працоўны дэсант быў задзейнічаны на МТК “Ключыкі” ААТ “Новая Друць”. Тут працавалі прадстаўнікі сфер адукацыі, культуры, работнікі райвыканкама, паштовай і электрычнай сувязі, БУКП “Жылкамгас”, ЦРБ і райЦГЭ, насеннай інспекцыі, ветэрынарнай станцыі, ФАКу “Друць” і інш. Усяго ў ім прынялі ўдзел больш за сто чалавек. Яны прыбіралі тэрыторыю комплексу, вакол яго і паміж вытворчымі будынкамі, падмяталі, выграбалі леташнюю траву, прыводзілі ў парадак клумбы, фарбавалі малыя архітэктурныя формы, водныя камунікацыйныя сістэмы ў жывёлагадоўчых памяшканнях, агароджу, ачышчалі ад гною выгульныя пляцоўкі для жывёлы, выконвалі рамонтныя работы…

Дырэктар ААТ “Новая Друць” Анатоль Драздоў застаўся задаволены такой дапамогай і ў гутарцы з карэспандэнтам газеты выказаў словы ўдзячнасці ўсім тым, хто прыняў удзел у суботніку на МТК “Ключыкі”.

Міхась КАРПЕЧАНКА.

Фота аўтара.