Акрэслілі планы на бягучы год

Днямі ў РЦК прайшоў справаздачны сход аддзела ідэалагічнай работы, культуры і па справах моладзі райвыканкама.

Падчас яго былі падведзены вынікі працы падведамасных устаноў і арганізацый за 2018 год. Удзел у сходзе прыняла і выступіла з прамовай намеснік старшыні райвыканкама Ірына ФУРСАВА.

Справаздачны даклад па выніках работы ўстаноў культуры і мастацтва за мінулы год зрабіла начальнік аддзела ідэалагічнай работы, культуры і па справах моладзі Іна ІГНАТОВІЧ.

– У 2018 годзе ва ўстановы і арганізацыі сферы культуры і мастацтва прыйшлі працаваць 9 маладых спецыялістаў, – адзначыла яна. – Між тым, работнікі культуры пастаянна павышаюць свой прафесійны ўзровень, праходзяць курсы павышэння кваліфікацыі, удзельнічаюць у семінарах, майстар-класах.

Асноўныя напрамкі працы ў 2019 годзе ўключаюць у сябе падтрымку сацыяльна значных праграм, папулярызацыю народнай культуры і творчасці, павелічэнне фонду раённага мастацкага музея імя В. К. Бялыніцкага-Бірулі, паляпшэнне якасці навучання, далейшае супрацоўніцтва з горадам-пабрацімам Рыльскам.

Як адзначыла падчас свайго выступлення дырэктар ЦКС Святлана КАНДРАЦЬЕВА, прыярытэтным кірункам дзейнасці цэнтралізаванай клубнай сістэмы з’яўляецца захаванне і развіццё традыцыйнай мясцовай культуры. У Год малой радзімы быў праведзены шэраг народных свят: Масленіца, Дажынкі, Каляды і іншыя.

– Настаўнікі і вучні ДШМ летась прынялі ўдзел у конкурсах розных узроўняў, – падкрэсліла яе дырэктар Таццяна ГАРНАСТАЙ. – Яны заваявалі 152 дыпломы, у тым ліку 115 – міжнароднага, 7 – рэспубліканскага, 18 – абласнога ўзроўняў. Акрамя таго, калектыў ДШМ стаў пераможцам раённага конкурсу імя В. К. Бялыніцкага-Бірулі на лепшую дзейнасць па эстэтычным, духоўна-маральным выхаванні насельніцтва.

Аб выніках працы за мінулы год, перспектывах развіцця і прыцягнення наведвальнікаў у раённы мастацкі музей распавяла яго дырэктар Таццяна ЦІКУНОВА:

– Летась з экспазіцыямі музея пазнаёміліся 12 326 чалавек, было прачытана 150 лекцый, праводзіліся культурна-адукацыйныя і музейна-педагагічныя мерапрыемствы. Дзеля прыцягнення новых наведвальнікаў і сёлета плануем далучыцца да акцыі “Ноч музеяў”, будзем праводзіць інтэлектуальныя гульні і квэсты.

Аб шэрагу праграм, якія рэалізоўваліся ў бібліятэках горада і раёна, распавяла бібліятэкар Алена ГРЫБАЙЛАВА:

– Нашы чытачы прымалі ўдзел у ажыццяўленні такіх цікавых падпраграм мэтавай праграмы “Бібліятэка – інфармацыйны цэнтр для моладзі”, як “Мой родны, любімы край”, “Здаровым быць модна” і іншыя. У рамках праекта “Бібліятэка без межаў” аказвалі дапамогу ў сацыяльнай рэабілітацыі сацыяльна неабароненым слаям насельніцтва.

– Хацелася б, каб кожны дзень работнікі культуры шукалі штосьці новае і цікавае, уводзілі гэта ў паўсядзённую практыку і так рухаліся наперад, – адзначыла Ірына Фурсава. – Таксама трэба звярнуць увагу на даволі невысокае далучэнне насельніцтва да самадзейных мастацкіх калектываў. Але праца, якую работнікі культуры робяць кожны дзень, карпатлівая і няпростая. Вялікі дзякуй вам за яе!

Нагадаем, што па выніках мінулагодняга абласнога спаборніцтва сярод аддзелаў ідэалагічнай работы, культуры і па справах моладзі раённых і гарадскіх выканаўчых камітэтаў другое месца заняў аддзел ідэалагічнай работы, культуры і па справах моладзі Бялыніцкага райвыканкама. Пераможцамі ў сваіх групах сталі Цэнтралізаваная клубная сістэма раёна, Вішоўскі СЦКіД. Калектывы іх узнагароджаны дыпломамі і грашовымі прэміямі.

Граматамі і падзячнымі лістамі розных узроўнях падчас сходу быў узнагароджаны шэраг работнікаў сферы культуры. Свае музычныя нумары ім падарылі артысты РЦК.

Выставу малюнкаў, прысвечаную прыгажосці Прыдруцкага краю, зрабілі супрацоўнікі ДШМ, а фітабар з травянымі чаямі і пачастункамі арганізавалі работнікі Цэнтральнай раённай бібліятэкі.

Алена БЫКАВА.

Фота аўтара.

Print Friendly, PDF & Email