У мінулую пятніцу на вытворчай базе ААТ “Новая Друць” прайшоў раённы семінар для кіраўнічага звяна сельгаспрадпрыемстваў

У мінулую пятніцу на вытворчай базе ААТ “Новая Друць” прайшоў раённы семінар для кіраўнічага звяна сельгаспрадпрыемстваў, на якім разгледжана арганізацыя  комплексу работ, звязаных з правядзеннем масавых вясенніх палявых работ, вытворчасцю малака.

Удзел у ім прынялі начальнік упраўлення па сельскай гаспадарцы і харчаванні райвыканкама Алег МАСЛАК, кіраўнік аддзела інтэнсіфікацыі вытворчасці сельгаспрадукцыі райсельгасхарчу Андрэй МАКАРЭВІЧ, дырэктар цэнтра павышэння кваліфікацыі кіруючых работнікаў камітэта па сельскай гаспадарцы і харчаванні аблвыканкама, кандыдат тэхнічных навук Якаў ЯРОЦКІ і іншыя спецыялісты.

Веснавыя работы ў таварыстве пачаліся ўжо. Аб гэтым сведчыць і флаг працоўнай славы, узняты на машынным двары гаспадаркі ў гонар перадавікоў, якія вызначыліся на выкананні гэтых работ. У прыватнасці, на ворыве глебы пад яравую сяўбу лідарства на трактары МТЗ 1523 у агрэгаце з плугам ППО-4-40 трымае Сяргей АРЛОЎ, які з пачатку сезона ўзняў 62,3 га зямлі, у тым ліку за апошні дзень 6,5 гектара. Анатоль ІГНАТОВІЧ на трактары МТЗ 3522 у шчэпе з агрэгатам “Тыгер” падрыхтаваў 126 гектараў глебы, у тым ліку за апошні дзень 26 га. Вядзецца і сяўба ранніх зерневых культур, аднагадовых траў. Напрыклад, механізатар Андрэй КРАМКОЎ на трактары МТЗ 3522 з сеялкай Horch загарнуў насенне ў глебу на 30 гектарах, у тым ліку за апошні дзень правёў сяўбу на 18 га.

Пазнаёміўшыся з узроўнем падрыхтаванасці сельскагаспадарчай тэхнікі і рамонтнай базы да правядзення ўсяго комплексу вясенне-палявых работ, уключаючы арганізацыю вывазкі на палі арганічных угнаенняў, сяўбы ранніх яравых культур і аднагадовых траў, удзельнікі семінара падрабязна разгледзелі стратэгію кіраўніцтва ААТ “Новая Друць” на час пасяўной кампаніі, нарыхтоўкі кармоў для грамадскага статку жывёлы. Пры гэтым, асаблівая ўвага была звернута на памесячныя, пачынаючы з красавіка і заканчваючы кастрычнікам, крыніцы забеспячэння грамадскага статку жывёлы зялёнымі кармамі на выпасе і падкормку яе на летне-пашавы перыяд утрымання, сенажом, сіласам, сенам – на будучую зімоўку.

Гэта і зразумела, бо забеспячэнне належнай кармавой базы з’яўляецца краевугольным каменем, на якім трымаецца, развіваецца жывёлагадоўчая галіна, ад чаго залежыць фінансавая стабільнасць кожнага сельгаспрадпрыемства. Іншымі словамі, будуць у гаспадарцы кармы, тады атрымаюць тут малако і мяса, а значыць, будуць і грошы за прададзеную адпаведную прадукцыю, і добрыя заробкі для работнікаў.

Падчас семінара грунтоўна абмяркоўваліся запланаваныя аб’ёмы вытворчасці кармоў, закладкі насеннікаў траў на бягучы год у разрэзе ўсіх сельгаспрадпрыемстваў, крыніцы кормавытворчасці. Напрыклад, ААТ “Новая Друць” плануе нарыхтаваць сёлета на больш як 7 з паловай тысячы галоў буйной рагатай жывёлы 38680 тон кармавых адзінак, ці па 50,11 цэнтнера іх на адну ўмоўную галаву, у тым ліку на зімова-стойлавы перыяд па 40,8 ц кармавых  адзінак, з якіх 32 – травяныя. У сувязі з гэтым гаспадарцы ў параўнанні з папярэднім годам неабходна павялічыць аб’ёмы закладкі сенажу на 127 працэнтаў, сіласу – на 198, сена – на 158 працэнтаў, а зернефуражную базу ўзмацніць амаль у 6 разоў.

Дырэктар таварыства Анатоль ДРАЗДОЎ распавёў пра крыніцы выканання запланаваных паказчыкаў кормавытворчасці, арганізацыйна- тэхнічныя і тэхналагічныя складнікі правядзення сяўбы, нарыхтоўкі травяных кармоў.

Алег Маслак з канкрэтнымі лічбамі і фактамі ў руках, можна сказаць, праэкзаменаваў кіраўніка таварыства і спецыялістаў райсельгасхарчу на прадмет бачання імі і разумення штодзённых крокаў, скіраваных на рэалізацыю гэтай стратэгіі.

– Вельмі важна, – адзначае Алег Рыгоравіч, – каб кіраўнікі, спецыялісты сельгаспрадпрыемстваў не толькі ўмелі на паперы выбудоўваць рэальную стратэгію развіцця жывёлагадоўлі, нарыхтоўкі кармоў, але і дакладна разумелі, усведамлялі яе. Прымалі абгрунтавана правільныя, а часам і нестандартныя, рашэнні, дакладна ведалі, што трэба зрабіць заўтра, паслязаўтра, праз месяц, квартал і гэтак далей, выразна бачылі крыніцы забеспячэння пастаўленых задач.

У сувязі з гэтым на семінары была дэтальна адпрацавана на летне-пашавы перыяд своеасаблівая “дарожная карта” руху выпасу буйной рагатай жывёлы ўсіх комплексаў таварыства.

Аб тэхнічна-тэхналагічных нюансах правядзення пасяўной кампаніі бягучага года, асаблівасцях рэгуліроўкі сеялак, глебаапрацоўчых агрэгатаў, іншых сельгасмашын, вагавых нормах высеву насення зерневых, бабовых, траў удзельнікам семінара ў ААТ “Новая Друць” падрабязна распавёў Якаў Яроцкі.

             Міхась КАРПЕЧАНКА

Фота аўтара.

 

Print Friendly, PDF & Email