9 мая жыхары Прыдруцкага краю адзначылі 74-ю гадавіну Перамогі савецкага народа ў Вялікай Айчыннай вайне
9 мая жыхары Прыдруцкага краю адзначылі самае важнае свята ў гісторыі нашай краіны – 74-ю гадавіну Перамогі савецкага народа ў Вялікай Айчыннай вайне.
Гэта дата па-асабліваму блізкая для кожнага чалавека, таму кожны год жыхары нашага раёна, Бялынічаў і госці горада аддаюць даніну памяці і павагі ўсім тым, хто цаной неверагодных намаганняў здабыў свабоду для нас, будучых пакаленняў.
Адчуванне свята з самай раніцы лунала ў паветры над Бялынічамі, а рознакаляровыя сцягі на вуліцах стваралі асабліва ўзнёслую атмасферу. У гэты дзень у райцэнтры было праведзена шмат мерапрыемстваў. Напачатку ўдзельнікі мастацкай самадзейнасці РЦК і моладзь раёна паказалі кранальны флэшмоб у гонар Вялікай Перамогі.
Пасля па галоўнай вуліцы горада прайшлі ўдзельнікі грамадска-патрыятычнай акцыі “Беларусь помніць” з партрэтамі родных, землякоў-франтавікоў. У шэсці прынялі ўдзел прадстаўнікі раённай улады, перадавікі народнай гаспадаркі, працоўныя калектывы арганізацый і ўстаноў раёна. Святочная калона накіравалася ў Ліпавы гай, дзе на алеі Герояў адбыўся ўрачысты мітынг у гонар Пераможцаў – ветэранаў Вялікай Айчыннай вайны.
Са словамі віншавання з Вялікай Перамогай да прысутных звярнуўся старшыня райвыканкама Анатоль ШЧУПЛЯНКОЎ. Ён адзначыў беспрэцэндэнтны подзвіг нашых дзядоў і прадзедаў, якія ў той складаны час не толькі мужна абаранялі Радзіму, але і ўзнімалі краіну з руін, сваёй стваральнай працай мацавалі яе будучыню.
З прывітальным словам да бялынічан звярнуўся ветэран Вялікай Айчыннай вайны Алег Назаравіч ПЛІНДОЎ. Зараз ён жыве ў Гомелі, але часта наведвае наш райцэнтр.
– Менавіта Бялынічы я лічу сваёй малой радзімай і, хоць тут не жыву, думкамі заўсёды з імі, – адзначыў Алег Назаравіч. – У 1924 годзе, калі ўтварыўся Бялыніцкі раён, мой бацька быў прызначаны начальнікам райаддзела міліцыі. Тады, у далёкім дзяцінстве, Бялынічы запомніліся мне сціплым мястэчкам, дзе жылі добрыя і спагадлівыя людзі. Наш сусед зрабіў на сваім двары мадэль самалёта, на якую бегалі дзівіцца ўсе мясцовыя хлопчыкі. Хто мог падумаць, што гэту ідылію можа парушыць вайна? Мы з бацькам пайшлі на фронт і вярнуліся з вайны пераможцамі, але самае галоўнае, – жывымі. Зараз я прыходжу на алею Герояў, святое для мяне месца, каб успомніць тых, з кім разам са зброяй у руках абараняў Радзіму. Дваіх з іх ведаў асабіста.
Падчас адной з сустрэч з расійскім паэтам-франтавіком Сяргеем АРЛОВЫМ знайшоў у яго творчасці вельмі цікавыя радкі:
– Когда это будет, не знаю:
В краю белоногих берёз
Победу девятого мая
Отпразднуют люди без слёз.
Поднимут старинные марши
Армейские трубы страны,
И выедет к армии маршал,
Не видевший этой войны.
И мне не додуматься даже,
Какой там ударит салют,
Какие там сказки расскажут
И песни какие споют.
Но мы-то доподлинно знаем,
Нам знать довелось
на роду,–
Что было девятого мая
Весной в сорок пятом году.
– Я ніколі не мог сабе ў’явіць, што дажыву да гэтага часу, – працягваў Алег Пліндоў. – Але прайшлі гады, змяніліся пакаленні, і словы паэта сталі прарочымі. Толькі наша пакаленне пераможцаў радзее з кожным годам. Смерць не ўзяла нас на фронце, але зараз выбівае знянацку, з-за вугла. Але ў нас чыстае сумленне, мы сваю справу зрабілі. І зараз ніхто не зможа адабраць у нас Перамогу.
Пасля таго, як у гонар ветэрана скончыліся апладысменты, ад імя маладога пакалення са словамі падзякі да ўсіх тых, хто здабываў для нас мір, выступіў вучань СШ № 2 райцэнтра Максім СІДАРОВІЧ. Памяць аб загінулых традыцыйна ўшанавалі хвілінай маўчання.
Пасля мітынгу стылізаваную канцэртную праграму прадставілі артысты РЦК, якія прама на сцэне аднавілі абстаноўку далёкіх 1940-х гадоў, успомнілі песні, якія спявалі салдаты на вайне. Гэтыя знаёмыя кожнаму мелодыі разам з выканаўцамі спявалі і гледачы.
Эстафету канцэртных нумароў працягнулі хор ветэранаў “Натхненне”, юныя навучэнцы дзіцячай школы мастацтваў, узорны вакальны ансамбль “Акварэлькі” і іншыя.
Побач з вялікай сцэнай дзейнічала тэматычная выстава, дзе на вялікіх пяцікутных зорках былі прымацаваны фотаздымкі і прозвішчы нашых землякоў – ветэранаў Вялікай Айчыннай вайны.
Традыцыйна працавалі тэматычныя падворкі сельсаветаў раёна, дзе ўсе жадаючыя маглі пачаставацца юшкай і салдацкай кашай, паспяваць і патанцаваць пад гармонік, набыць для сябе памятны сувенір.
Райбібліятэка і МЦ “Ветразь” падрыхтавалі інтэрактыўныя пляцоўкі для дзяцей з выставамі і гульнямі, а таксама фотазонамі, дзе можна было зрабіць тэматычнае фота.
Працаваў і гарадскі стадыён. У гонар Дня Перамогі праводзіліся спаборніцтвы па валейболе, футболе і стрытболе, праходзіў турнір па шашках… Словам, ніхто не сумаваў. А вечарам на летняй пляцоўцы Ліпавага гаю адбылася маладзёжная дыскатэка.
Святлана МАГІЛЕЎЧЫК.
Фота аўтара,
Марыі ШУТ і Міхася КАРПЕЧАНКІ.