Зберагчы кожнае маленькае жыццё
Дзяцінства – самая яркая і бесклапотная пара. Але як у побыце, так і на вуліцы, разам з цікавымі адкрыццямі дзяцей чакаюць шматлікія небяспекі. З мэтай папярэджання надзвычайных сітуацый з удзелам дзяцей з 11 мая па 1 чэрвеня ў Магілёўскай вобласці пройдзе рэспубліканская акцыя “Не пакідайце дзяцей адных!”, прымеркаваная да Міжнароднага дня сям’і і Дня абароны дзяцей.
Акцыя ўключае ў сябе 4 этапы. Першы з іх праходзіць па 15 мая і прымеркаваны да Міжнароднага дня сям’і. Ратавальнікі падрыхтавалі для ўсіх жадаючых у ФАКу “Друць” 11 мая інтэрактыўную пляцоўку з конкурсамі, віктарынамі, гульнямі з уручэннем прызоў.
У другім этапе (16 – 24 мая) асноўны акцэнт будзе зроблены на працу з бацькамі. Ратавальнікі з прафілактычнай місіяй накіруюцца ў ЦРБ, а таксама прымуць удзел у бацькоўскіх сходах дашкольных і агульнаадукацыйных устаноў.
З 27 па 30 мая акцыя пройдзе ў мнагадзетных сем’ях і дзіцячым доме сямейнага тыпу. Запланавана таксама правядзенне сямейнага спартыўнага свята “Мама, тата, мы – у бяспецы моцныя!”
Чацвёрты этап, з 31 мая па 1 чэрвеня, прымеркаваны да Міжнароднага дня абароны дзяцей. На адкрытых пляцоўках удзельнікаў чакае насычаная і відовішчная праграма: канцэрты, забаўляльныя конкурсы, віктарыны па АБЖ, тэматычныя гульні з гледачамі, прафілактычныя гутаркі, дэманстрацыя аварыйна-выратавальнай тэхнікі і абсталявання, распаўсюджванне сувенірнай і навучальнай наглядна-выяўленчай прадукцыі.
Няхай светлая пара дзяцінства будзе бяспечнай!
Кацярына ЛЮБІВАЯ,
інспектар ГПіУГ РАНС.