Дома нават сцены дапамагаюць

Маладыя людзі, якія застаюцца жыць і працаваць на малой радзіме, амаль што адзінагалосна пацвярджаюць прымаўку, што дома нават сцены дапамагаюць. Сапраўды, лягчэй стартаваць у вялікае жыццё менавіта з таго месца, дзе нарадзіўся, ведаеш кожную сцежку, кожную вуліцу, людзей, якія жывуць побач… 

Бялынічанін Максім СТУКАЛАЎ жартуе, што патрапіў у БУКП “Жылкамгас” па волі лёсу. У 2013 годзе малады чалавек скончыў Магілёўскі архітэктурна-будаўнічы каледж і планаваў уладкавацца на працу ў ПМК-241. Але ў той дзень, калі збіраўся наведаць адміністрацыйны будынак гэтай арганізацыі, выпадкова зазірнуў у жылкамгас і пацікавіўся, ці патрэбны ім спецыялісты з будаўнічай адукацыяй. Яго прынялі на пасаду інжынера вытворча-тэхнічнага аддзела з выпрабавальным тэрмінам на тры месяцы. У хуткім часе Максім стаў выконваць абавязкі намесніка начальніка ВТА. Малады чалавек паступіў завочна ў Полацкі дзяржаўны ўніверсітэт, і зараз атрымлівае вышэйшую адукацыю па спецыяльнасці “інжынер-будаўнік”.

– У пачатку маёй прафесійнай дзейнасці асвоіцца на працоўным месцы дапамагалі ўсе: ад дырэктара Віктара ІВУЛЁВА да майстроў і будаўнікоў, з кім непасрэдна прыходзілася працаваць, – адзначае Максім. – Моцны, згуртаваны калектыў – гэта першае і галоўнае, што прываблівае мяне ў жылкамгасе. Зараз я сам актыўна дзялюся вопытам з маладымі хлопцамі, якія прыходзяць да нас на практыку.

Працаўнікі ўчастка ВТА БУКП “Жылкамгас” выконваюць розныя віды будаўнічых работ. Гэта і капітальны рамонт жыллёвага фонду, і мадэрнізацыя цепласетак, рамонт і падрыхтоўка да ацяпляльнага сезону кацельняў.

Такая адказная праца не перашкаджае маладому чалавеку паспяхова рэалізаваць сябе і ў грамадскай дзейнасці. У ліпені мінулага года ён узначаліў прафсаюзную пярвічку БУКП “Жылкамгас”. Акрамя гэтага, Максім адказвае за фізкультурна-спартыўную работу, якая ўключае ў сябе падрыхтоўку і правядзенне спартыўных спаборніцтваў як унутры арганізацыі, так і ўдзел у раённай круглагадовай спартакіядзе.

– Мне нескладана ўсім гэтым займацца, – упэўнена гаворыць малады чалавек. – У прафсаюзнай дзейнасці ўсё рухаецца па адладжанай сістэме, дзейнічае прафактыў, з якім вырашаем бягучыя пытанні, напрыклад, па аказанні матэрыяльнай дапамогі тым, хто апынуўся ў цяжкай сітуацыі. Спартыўнае жыццё таксама вельмі насычанае. З работнікаў арганізацыі створана валейбольная каманда, якая зараз актыўна трэніруецца ў ФАКу “Друць”.

Што тычыцца больш буйных дасягненняў, то па выніках за мінулы год жылкамгасаўцы занялі ІІ месца ў агульным заліку ў круглагадовай раённай спартакіядзе.

Нядаўна ў жыцці Максіма адбылася яшчэ адна прыемная падзея – вяселле. У жылкамгасе ён сустрэў свой лёс. З будучай жонкай Вікторыяй вучыліся разам у Магілёве і так склалася, што сталі працаваць у адной арганізацыі. Зараз жонка – найлепшая падтрымка для яго і дарадца. А што лепш за надзейны сямейны тыл можа дапамагаць дасягаць новых вяршыняў у жыцці і працы?

Святлана МАГІЛЕЎЧЫК.

Фота аўтара.

Print Friendly, PDF & Email