Аглядальная камісія

Прафілактыка надзвычайных сітуацый праз інфармаванне, супрацьпажарныя інструктажы, гутаркі з прывядзення канкрэтных прыкладаў надзвычайных сітуацый, распаўсюджанне нагляднай агітацыі адпаведнай тэматыкі, выяўленне прычын і ўмоў, якія ўплываюць на бяспеку жыццядзейнасці грамадзян, і іншае – галоўнае ў дзейнасці аглядальных камісій.

Адна з іх у складзе старшага інжынера групы арганізацыі функцыянавання ДСНС і ГА РАНС Ільі ЦІКУНОВА і дзяржінспектара энерганагляду РУП “Магілёўэнерга” Мікалая ЛЕСНІКА наведала ў райцэнтры некалькі домаўладанняў адзінокіх і адзінока пражываючых грамадзян, сям’і, дзеці якіх знаходзяцца ў сацыяльна небяспечным становішчы.

У адной з кватэр, куды завіталі члены аглядальнай камісіі, выхоўваюцца двое непаўналетніх, якія знаходзяцца ў сацыяльна небяспечным становішчы. Калісьці там быў зафіксаваны факт пакідання дзяцей без нагляду, а таксама наяўнасці запазычанасці за спажыванне электраэнергіі.

Запазычанасць, як паведаміла гаспадыня, пагашана. Аўтаномныя пажарныя апавяшчальнікі знаходзіліся ў спраўным стане, а непаўналетнія – пад наглядам бацькоў.

Ілья Цікуноў і Мікалай Леснік яшчэ раз нагадалі маладым бацькам аб асноўных правілах пажарнай бяспекі, заклікалі іх выконваць, каб не наклікаць у дом бяду.
Яшчэ ў адным домаўладанні, дзе таксама пражываюць дзеці, Мікалай Леснік парэкамендаваў замяніць прыборы экстранага адключэння электралічыльніка: – У вас праводка алюмініевая, таму лепш паставіць магутнасцю 16 ампер замест 25.


У домаўладаннях з пячным ацяпленнем члены назіральнай камісіі ў першую чаргу звярталі ўвагу на спраўнасць ацяпляльных прыбораў.

У сям’і бялынічан Ш. дзве печы, абкладзеныя пліткай. На адной з іх каля пячных дзверцаў яна абвалілася.
– Гэта трэба адрамантаваць, – звярнуў увагу гаспадароў Ілья Цікуноў. – А таксама рэкамендуем вам устанавіць АПА.
Ён прывёў некалькі канкрэтных прыкладаў, калі гэты невялікі пластмасавы прыбор выратаваў чалавечае жыццё.
Наведалі ў той дзень і дзіцячы дом сямейнага тыпу. На дадзены момант там выхоўваюцца сямёра непаўналетніх, і, адпаведна, бяспека павінна быць на першым месцы. Так і ёсць: усе чатыры апавяшчальнікі ў спраўным стане. З электралічыльнікам і праводкай, па словах Мікалая Лесніка, таксама ўсё ў парадку.

Тэкст і фота Марыі ШУТ.

Print Friendly, PDF & Email