Свята, прысвечанае ўшанаванню выпускнікоў устаноў адукацыі раёна, прайшло ў мінулую суботу ў РЦК
Свята, прысвечанае ўшанаванню выпускнікоў устаноў адукацыі раёна, прайшло ў мінулую суботу ў РЦК.
Мабыць, самыя кранальныя ўспаміны кожнага з нас звязаныя са школьнымі гадамі і выпускным балем. Менавіта ў школе мы праходзім самы адказны перыяд свайго жыцця, які называецца сталеннем. Прыгадайма кожны, якім ты быў першакласнікам і якім стаяў на пляцы з яркай лентай праз плячо: “Выпускнік… года”! Шлях ад першакласніка да выпускніка – ментальная дарога ў тваю будучыню. Дарога, якую ты праходзіш разам з аднакласнікамі, настаўнікамі, бацькамі…
Шлях ад першакласніка да выпускніка – гэта тваё сталенне, фарміраванне ўстойлівасці твайго характару, тваіх жыццёвых пазіцый, грамадзянскасці. Усё, што будзе з табой пазней, так ці інакш абапіраецца, як на самы магутны падмурак, на твой характар, што сфарміраваўся акурат у школе.
8 чэрвеня 104 нашых юных землякоў, 14 з якіх атрымалі атэстаты асаблівага ўзору і залатыя медалі за поспехі ў вучобе, у адно імгненне перайшлі ў новы статус: развітаўшыся з дзяцінствам, яны сталі дарослымі.
Павітаць учарашніх школьнікаў прыйшлі старшыня райвыканкама Анатоль ШЧУПЛЯНКОЎ, прадстаўнікі мясцовай улады і грамадскасці, настаўнікі, бацькі, настаяцель храма ў гонар іконы Маці Божай Бялыніцкай а. Сергій…
– Наперадзе ў кожнага з вас цяпер самы адказны перыяд, – звярнуўся да выпускнікоў кіраўнік раёна. – Жадаю вам мудрасці, цярпення, здароўя, сіл, ведаў, правільнага выбару будучай прафесіі. Выдатна здаць цэнтралізаванае тэсціраванне.
Берагчы школьнае сяброўства.
Бялыніччына ганарыцца сваімі вядомымі землякамі. Спадзяюся, што шэрагі іх папоўняць у свой час і прадстаўнікі сёлетняга выпуску школ нашага раёна.
Анатоль Леанідавіч уручыў 14 учарашнім ужо школьнікам атэстаты сталасці і залатыя медалі, бацькам – падзякі.
Ад імя бацькоў сёлетніх выпускнікоў са словамі сардэчнай падзякі настаўнікам за іхнюю самаадданую працу звярнуўся бялынічанін Руслан ЗУБРЫЦКІ. Ён таксама пажадаў усім выпускнікам добрай, шчаслівай дарогі ў іх самастойным, дарослым жыцці, якое толькі што для іх пачынаецца.
…Прызнацца, у вірлівай плыні выпускнікоў, якія накіроўваліся ад аддзела па адукацыі райвыканкама да РЦК, дзе адбылася ўрачыстая цырымонія ўручэння атэстатаў сталасці, адразу не пазнаў Маргарыту ЛАШКЕВІЧ, выпускніцу СШ № 1 імя М. І. Пашкоўскага, неаднаразовую ўдзельніцу рэдакцыйных конкурсаў, гераіню публікацый “Зары над Друццю”. Настолькі дзяўчына пасталела! Адкрыю невялічкі сакрэт: вяліся перамовы, каб Маргарыта звязала свой лёс з журналістыкай. Аднак яна выбрала іншую прафесію. Удачы табе, Маргарыта!
…Дырэктар Вішоўскай СШ Кацярына ЗАЙЦАВА паведаміла карэспандэнту раёнкі, што з пяці сёлетніх выпускнікоў гэтай установы адукацыі трое будуць паступаць у Клічаўскі аграрны каледж. Значыць, яны прадаўжаюць добрую традыцыю некалькіх дзясяткаў сваіх папярэднікаў, якія выбралі для сябе працу на роднай зямлі.
У добры шлях, ВЫПУСКНІКІ школ раёна 2019 года!
І хай вам заўсёды шчасціць у жыцці, у выбары прафесіі, якая павінна застацца адзінай і любімай, на працы, у сябрах, якія заўсёды падтрымаюць і дапамогуць, і ў ва ўсім-усім астатнім…
P.S. Карэспандэнты газеты “Зара над Друццю” будуць уважліва сачыць за вашым далейшым лёсам, паважаныя выпускнікі школ раёна 2019 года, за вашымі прафесійнымі дасягненнямі і абавязкова раскажуць землякам-бялынічанам пра вашы будучыя поспехі і заслугі.
Міхась КАРПЕЧАНКА.
Фота аўтара.