Рэспубліканскае свята «Купалле» («Александрыя збірае сяброў») у дзясяты раз прайшло на маляўнічым беразе ракі Днепр у аграгарадку Александрыя Шклоўскага раёна.
Тэма малой радзімы стала галоўнай на гэтым свяце. Сёлета Александрыя гасцінна сустрэла дэлегацыі з 6 краін: Расіі і Украіны, Эстоніі, Літвы, Латвіі, Польшчы. Іх прадставілі калектывы народнай творчасці і майстры дэкаратыўна-ўжытковага мастацтва.
Сярод удзельнікаў мерапрыемства было больш за 2 тысячы прафесійных і самадзейных артыстаў, майстроў дэкаратыўна-ўжытковай творчасці.
Кожны рэгіён Беларусі прадставіў свой самы вядомы фестывальны праект.
Нацыянальным каларытам гасцей “Купалля” парадавалі прадстаўнікі Курска, Цверы, Ніжняга Ноўгарада, Разані, Івана-Франкоўска, Цярнопаля і Херсона…
Адзначым, што з самага пачатку правядзення свята “Купалле” дэманструе аб’яднаўчую сілу народнай культуры і традыцый, імкненне да міру, яднання і пашырэння культурнага дыялогу паміж краінамі.
І сёлета арганізатары зрабілі знаходжанне гасцей свята максімальна камфортным. За два дні мерапрыемства наведалі каля 90 тысяч чалавек. Іх чакала насычаная культурна-забаўляльная праграма. Кожны мог узяць удзел у шматлікіх майстар-класах, тэматычных квэстах, спартыўных спаборніцтвах, гульнях і конкурсах.
Цэнтральнай падзеяй свята стаў грандыёзны гала-канцэрт “Зроблена ў Беларусі” на галоўнай пляцоўцы з удзелам замежных і айчынных выканаўцаў. А фіналам першага дня з’явіліся маляўнічае піратэхнічнае шоу і начная моладзевая дыскатэка з удзелам папулярных груп і дыджэяў.
На працягу двух дзён свята праводзіўся “Александрыйскі кірмаш” з экспазіцыйна-тэматычнымі купальскімі падворкамі. Гандлёвыя кропкі размясціліся на “Александрыйскім гасцiнцы”.
Пляцоўка “Творчасць маладых” стала месцам дэманстрацыі спартыўных, творчых, навукова-тэхнічных дасягненняў моладзі. Падчас свята былі адкрыты павільёны “Кніжны кірмаш” і “Друкарскі двор” з зонамі вытворчасці паперы і друку, правядзены прэзентацыі кніг і часопісаў.
Па-свойму цікавай і ўнікальнай стала пляцоўка “Свята цырка ў Александрыі” з выступленнямі, гульнямі і атракцыёнамі.
На малой сцэне ў першы дзень адбылося адкрыццё свята і прайшлі тры канцэрты, у якіх выступілі творчыя калектывы з усіх рэгіёнаў Беларусі і краін-удзельніц “Купалля”, дзіцячыя ансамблі Магілёўскай вобласці, прафесійныя артысты Прыдняпроўскага краю.
7 ліпеня прайшло традыцыйнае ўшанаванне перадавікоў аграпрамысловага комплексу Магілёўскай вобласці. Па выніках абласнога спаборніцтва СВК “Калгас “Радзіма” заняў І месца ў Прыдняпроўскім краі па вытворчасці і продажы мяса, ІІ месца ў намінацыі “Эканамічная эфектыўнасць сельскагаспадарчай вытворчасці”, ІІ месцам адзначаны і кормаўборачны атрад перадавой у краіне гаспадаркі.
Узнагародамі аблвыканкама былі адзначаны таксама аператар машыннага даення кароў Надзея НОВІКАВА, звяно даярак у складзе Людмілы БРЫЛЁВАЙ, Тамары КАРАЛЁВАЙ, Алены ГАПАЕВАЙ, жывёлаводы Галіна і Мікалай ЛЯНЕЎСКІЯ, групе работнікаў АПК Магілёўшчыны былі ўручаны ганаровыя граматы і падзякі аблвыканкама.
Міхась КАРПЕЧАНКА.
Фота Марыям ТАБАГАРЫ.
