Падрыхтоўка да школы справа адказная

Многія школьнікі чакаюць пачатак навучальнага года з радасцю і хваляваннем. А ў іх бацькоў – свае турботы.

Апошнія тыдні лета для іх самая напружаная пара: не так многа часу застаецца для таго, каб падрыхтаваць дзяцей да школы, патраціцца з толкам і купіць тое, што не абцяжарыць фінансава, праслужыць доўга, а галоўнае, спадабаецца сынам і дочкам.

Хтосьці аддае перавагу школьнаму базару, які працуе ў Магілёве, але ж нядрэнны шопінг можна зрабіць і ў нашым горадзе.

Традыцыйна, шырокі выбар тавараў для школьнікаў прапануюць магазін “Тавары для дзяцей” і павільён “Прывітанне, школа!” райста. Тут можна набыць і канцтавары, і абутак, верхнюю і форменную вопратку, бялізну для дзяцей. Кошт на спартыўныя штаны для хлопчыкаў і дзяўчынак пачынаецца ад 19 рублёў, на майкі і “вадалазкі” – ад 8 рублёў. Для дзяўчынак асартымент прадукцыі шырэйшы: можна набыць сарафаны, блузкі, спаднічкі, камізэлькі, камплекты школьнай формы. Кошт пачынаецца ад 16 рублёў. Зручныя туфлікі ад фірм “Марка” і “Нёман” спадабаюцца маленькім модніцам. У магазіне можна прыгледзець і спартыўны абутак для дзетак розных узростаў вытворчасці Лідскай абутковай фабрыкі.

Касцюмы дзелавога стылю для хлопчыкаў прадстаўлены прадукцыяй айчынных вытворцаў і каштуюць ад 60 рублёў і вышэй. Да іх можна падабраць туфлі, кашулю і класічны гальштук. І ўсё ў адным магазіне!

Дарэчы, да 31 жніўня ў магазінах райста на асартымент школьных тавараў дзейнічае зніжка ў 10%. І яшчэ тыдзень будзе дзейнічаць 20%-ая зніжка на абутак маркі “Нёман”.

А вось гальштукаў-матылькоў у Бялынічах выбар невялікі. Таму, калі ваш юны джэнтльмен аддае перавагу “бабачцы”, лепш пашукаць яе на спецыялізаваным рынку ў абласным цэнтры.

Асобна патрэбна паклапаціцца аб школьным ранцы. Для вучняў малодшых класаў не трэба эканоміць на яго пакупцы. Галоўнае – зручнасць і цвёрдая спінка, каб у дзіця не псавалася пастава. Такі ранец будзе каштаваць і 40, і 70 рублёў. Пры выбары рукзакоў для дзяцей старэйшага школьнага ўзросту можна цалкам пакласціся на густ будучага ўладальніка. У падлеткаў часта мяняюцца настрой і жаданні, таму на працяглы час купляць ранец не варта. Прыгожыя і функцыянальныя рукзакі прапануюць прыватныя прадпрымальнікі раёна. Кошт на іх пачынаецца ад 15 рублёў.

Канцтавары, дзённікі, тэматычныя сшыткі, папкі, альбомы і г. д. у шырокім асартыменце прадстаўлены ў гандлёвых кропках “Магілёўсаюздрук”.

Там таксама можна купіць прылады для чарчэння, малявання, дэкаратыўна-ўжытковай творчасці… Словам, усё, каб задаволіць любы мастацкі густ.

Перад тым, як наведаць магазіны, лепш за ўсё скласці спіс патрэбных вам і вашым дзецям рэчаў. Можна запытацца пра такі спіс у школе, а можна скарыстацца тым, які надрукаваны ў раённай газеце. Правільна арганізуючы свае пакупкі, патраціце тую суму грошай, на якую разлічвалі, і атрымаеце ад шопінгу задавальненне.

Святлана МАГІЛЕЎЧЫК.

Фота аўтара.

Print Friendly, PDF & Email