У фруктовым садзе СВК “Калгас “Радзіма” другі тыдзень працуе студэнцкі атрад імя Сяргея Церашкевіча.

У склад яго ўваходзяць старшакласнікі Вішоўскай СШ. Да абеду яны вучацца, а пасля заняткаў убіраюць яблыкі ў садзе сельгаспрадпрыемства. Як адзначыла першы сакратар РК ГА “БРСМ” Марына ШАБУСАВА, дзейнасць гэтага студатрада завершыць працоўны семестр 2019 года.

– Школьнікі працуюць да пяці вечара і, канечне ж, вельмі стараюцца, – дадае аграном-плодаагароднінавод гаспадаркі Мікіта БАЛАХОНЦАЎ. – За гэты час яны збіраюць да 5 тон яблыкаў.

Увогуле, сельгаспрадпрыемства прадаставіла школьнікам магчымасць нядрэнна зарабіць. У дзень юныя працаўнікі атрымліваюць па 8 рублёў.

Па словах Мікіты Балахонцава, праца студатрада прадоўжыцца да 18 верасня, а калі будзе вытворчая неабходнасць, то і на некалькі дзён больш.

Зараз у садзе СВК “Калгас “Радзіма” ўборка фруктаў у самым разгары. Таварныя яблыкі рэалізуюцца ў аграгарадку Вішоў і на кірмашах, якія праводзяцца ў райцэнтры, апалыя адпраўляюць на перапрацоўчыя прадпрыемствы ў Магілёў, Кіраўск і Гомель.

Святлана МАГІЛЕЎЧЫК.