Сабакі выйшлі з-пад кантролю

Падарунак за чужы кошт? Загадчыца ўніверсама “Ластаўка” патэлефанавала ў дзяжурную службу РАУС і паведаміла, што незнаёмы малады чалавек хацеў вынесці з гандлёвай кропкі тры пары жаночых калготак. Праваахоўнікі ўстанавілі асобу наўмысніка. ААПП праводзіць праверку.

Без нагляду. Жыхарка вёскі Старое Сяло звярнулася ў міліцыю са скаргай на аднавяскоўца, сабака якога пакусаў яе малалетнюю дачку. Праверку праводзіць ААПП. У той жа дзень ад беспрыгляднага сабакі пацярпела бялынічанка.

У адносінах да нядбайнага гаспадара жывёліны складзены адміністрацыйны пратакол.

Абое рабое. Жыхарка аграгарадка Вішоў патэлефанавала ў міліцыю і паскардзілася на знаёмага, які падчас канфлікту зламаў ёй руку. На наступны дзень у дзяжурную службу РАУС паступіла заява ад гэтага мужчыны, які патлумачыў праваахоўнікам, што вішаўчанка сама завязала з ім сварку, накідвала вяроўку на шыю і пагражала забойствам. ААПП праводзіць праверку.

Не спіцца. Бялынічанка паведаміла ў міліцыю, што на мабільны ёй тэлефануе знаёмая жанчына, якая лаецца і пагражае. Усё б нічога, але тэлефонныя размовы адбываліся ў гадзіну ночы. ААПП праводзіць праверку.

Зноў п’яны. Не дачакаўся канца рабочага дня вадзіцель райста. Ужо ў 16.20 ён нападпітку знаходзіўся на сваім рабочым месцы. Кіраўніцтва райста накіравала ў міліцыю зварот з просьбай прыцягнуць парушальніка да адказнасці.

Небяспечная цацка. Бялынічанін патэлефанаваў у міліцыю і паведаміў, што яго малалетні пляменнік знайшоў і прынёс дадому гранату часоў ВАВ.

Не размінуўся. Бялынічанін паскардзіўся праваахоўнікам, што ў ноч на 7 верасня невядомы вадзіцель зачапіў яго аўтамабіль, які стаяў на стаянцы каля шматпавярховага дома, і прычыніў машыне механічныя пашкоджанні.

Ганна КАВАЛЁВА.

Print Friendly, PDF & Email