Пагадзіцеся, у многіх з нас, калі вучыліся ў школе, былі прадметы, якія мы любілі, ці, наадварот, адносіліся да іх непрыязна. Часцей за ўсё ў няміласць патраплялі дакладныя навукі: хімія, фізіка і асабліва матэматыка. Ад настаўнікаў патрабавалася шмат цярпення і прафесіяналізму, каб прывіць дзецям любоў да свайго прадмета.

Ужо чвэрць стагоддзя навучае матэматыцы вучняў СШ № 2 райцэнтра Ларыса НАБОКАВА. І ўвесь гэты час ніводнага разу не пашкадавала, што звязала сваё жыццё з педагагічнай дзейнасцю. За шматгадовую плённую працу і ў сувязі з Днём настаўніка яна ўзнагароджана Ганаровай граматай райвыканкама.

– На іншым месцы і не ўяўляю сябе, – распавядае Ларыса Уладзіміраўна. – Як толькі скончыла педуніверсітэт імя А. Куляшова, вярнулася працаваць у родную школу. Любоў да матэматыкі прывілі цудоўныя педагогі Людміла КАРАНКЕВІЧ і Ларыса БАЖКО. Яны выкладалі гэты прадмет так, што на кожным уроку мы даведваліся шмат цікавага і карыснага. Зараз і я стараюся, каб тыя веды, якія вучні атрымаюць на ўроках матэматыкі, спатрэбіліся ім у далейшым жыцці.

Ларыса Уладзіміраўна адзначае, што сярод цяперашняга пакалення многа матываваных дзяцей, якія ўжо ў восьмым – дзявятым класах ведаюць, кім хочаць працаваць і што патрэбна, каб паспяхова рэалізаваць сябе ў будучым. У 9А класе, кіраўніком якога яна з’яўляецца, школьнікі на павышаным узроўні вывучаюць рускую мову і матэматыку. Найбольш актыўныя вучні займаюцца ў завочнай школе “Юны матэматык” у Магілёве. Гэтыя дыстанцыйныя заняткі дадатна ўплываюць затым на вынікі экзаменаў і цэнтралізаванага тэсціравання.

– Выявіць у дзіця здольнасці да вывучэння асобных школьных прадметаў не цяжка, – дадае Ларыса Набокава. – Важна яшчэ падтрымаць, знайсці да яго падыход. Гэта і ёсць галоўная задача настаўніка.  Прыемна ведаць, што многія мае выпускнікі выбіралі прафесіі, звязаныя з дакладнымі навукамі.

Падзякай райвыканкама за шматгадовую дабрасумленную працу, вялікі асабісты ўнёсак у развіццё духоўнага і інтэлектуальнага патэнцыялу падрастаючага пакалення і ў сувязі з прафесійным святам — Днём настаўніка — узнагароджана намеснік дырэктара па вучэбна-выхаваўчай рабоце МЦ “Ветразь” Вольга АЎСЯННІКАВА.

Святлана МАГІЛЕЎЧЫК.

Фота аўтара.