Дзень аховы працы прайшоў на базе ДЛГУ “Бялыніцкі лясгас”
Стварэнне бяспечных умоў працы, ахова жыцця і здароўя работнікаў — першарадная задача працадаўцаў.
Дзень аховы працы прайшоў на базе ДЛГУ “Бялыніцкі лясгас”. Удзельнікі мерапрыемства абмеркавалі стан работы па ахове працы ў раёне, меры па зніжэнні няшчасных выпадкаў на вытворчасці і іншыя важныя пытанні.
Начальнік аддзела пенсій і дапамог упраўлення па працы, занятасці і сацыяльнай абароне райвыканкама Ганна ЛАПО распавяла пра змены ў пенсійным заканадаўстве.
Аб рабоце па ахове працы ў ДЛГУ “Бялыніцкі лясгас” паведаміла начальнік бюро па ахове працы Святлана КУЗНЯЦОВА:
– У нашай арганізацыі шмат робіцца, каб у людзей былі добрыя і бяспечныя ўмовы працы, – адзначыла Святлана Віктараўна. – На станцыі, дзе ажыццяўляецца пагрузка драўніны, устаноўлена новая сучасная рампа. З яе з’яўленнем весці пагрузачна-разгрузачныя работы стала значна прасцей і бяспечней. Таксама тут з’явіўся і спецыяльны домік, дзе пры неабходнасці працаўнікі могуць пагрэцца, пераапрануцца, адпачыць і паабедаць.
Аб расследаванні і ўліку няшчасных выпадкаў на вытворчасці, забеспячэнні работнікаў сродкамі індывідуальнай абароны распавёў галоўны інспектар Магілёўскага абласнога ўпраўлення Дэпартамента дзяржаўнай інспекцыі працы Яраслаў БІЛАН, які адзначыў, што ў гэтым годзе рост смяротных выпадкаў і траўміравання работнікаў назіраецца не толькі ў нашым раёне, але і па ўсёй вобласці. У сувязі з гэтым спецыяліст падрабязна спыніўся на пытаннях выканання правіл і норм па ахове працы.
З дакладам аб забеспячэнні пажарнай бяспекі на вытворчасці і ў побыце выступіў начальнік РАНС Віталь ВОРАНАЎ.
Прысутнічала на семінары і галоўны ўрач райЦГЭ Алена ДАМАРАЦКАЯ. Яна распавяла аб цеснай сувязі ўмоў працы і санітарна-бытавога забеспячэння з прадукцыйнасцю працы і спрыяльным мікракліматам у калектыве. Таксама яна нагадала аб пачатку сезона вакцынацыі супраць грыпу.
У семінары прыняў удзел інспектар па энергетычным і газавым наглядзе Мікалай ЛЕСНІК, які распавёў аб неабходнасці строгага выканання патрабаванняў работнікамі, якія працуюць на электраўстаноўках, аб працы ў ахоўных зонах ЛЭП і адказаў на пытанні ўдзельнікаў.
Аліна ЦЫГАНІЙ.
Фота аўтара.