Міністр інфармацыі Рэспублікі Беларусь Аляксандр Карлюкевіч наведаў Бялынічы
Міністр інфармацыі Рэспублікі Беларусь Аляксандр КАРЛЮКЕВІЧ у мінулую сераду наведаў Бялынічы.
Падчас знаходжання ў нашым горадзе Аляксандр Мікалаевіч пазнаёміўся з дзейнасцю ўстановы “Рэдакцыя раённай газеты “Зара над Друццю”. Міністр таксама пацікавіўся фінансава-эканамічным станам установы, перспектывамі яе далейшага развіцця, планамі па забеспячэнні акупнасці выдання, паглыбленні яго інфармацыйна-тэматычнай змястоўнасці.
Аляксандр Карлюкевіч адзначыў, што ў сённяшнім зменлівым, імклівым грамадстве значным складнікам дзейнасці рэдакцый сродкаў масавай інфармацыі з’яўляецца канкурэнцыя. СМІ канкурыруюць як у творчым напрамку, так і ў сферы фінансава-эканамічнай, дзе вядзецца барацьба за рэкламадаўцаў. На думку міністра, паспяховасць газеты наўпрост залежыць ад якасці працы калектыву яе, творчага майстэрства журналістаў, умення іх генерыраваць і рэалізоўваць свежыя ідэі, аператыўна і аб’ектыўна асвятляць грамадска-палітычнае, сацыяльнае жыццё раёна ва ўсіх яго праявах, адгуквацца на праблемы насельніцтва. Пры гэтым для паспяховага прасоўвання свайго інфармацыйнага кантэнту неабходна пастаянна выкарыстоўваць новыя тэхналогіі.
– Свет імкліва змяняецца, змяняецца само грамадства, – падкрэсліў Аляксандр Карлюкевіч, – павінны змяняцца і самі журналісты. Павялічваюцца таксама і патрабаванні да іх кампетэнцый.
Міністр прааналізаваў афіцыйны сайт газеты “Зара над Друццю”, даў слушныя парады па яго далейшым развіцці, працы ў сацыяльных сетках.
У гэты ж дзень Аляксандр Карлюкевіч правёў у райвыканкаме асабісты прыём грамадзян і прамую тэлефонную лінію.
Як намеснік старшыні Нацыянальнага арганізацыйнага камітэта па падрыхтоўцы і правядзенні ХХVІІ Дня беларускага пісьменства, сталіцай якога 6 верасня наступнага года стануць Бялынічы, Аляксандр Карлюкевіч разам са старшынёй райвыканкама Васілём ЗАХАРЭНКАМ і яго намеснікам Ірынай ФУРСАВАЙ папрацавалі над напаўненнем творчай праграмы свята, вызначылі тэматычныя кірункі кніжнай прадукцыі, якую неабходна будзе выдаць да ХХVІІ Дня беларускага пісьменства. Таксама яны наведалі будучыя пляцоўкі свята і шэраг аб’ектаў мясцовай культурнай сферы.
Міхась КАРПЕЧАНКА.