Любоў да кветак вылілася ў агульную справу
З канца лістапада ў памяшканні Дома быту запрацавала новая гандлёвая кропка “Кветкі для Вас”.
Гаспадынь гэтага прыгожага магазіна Таццяну СТАРАВОЙТАВУ і Анастасію ЛЫЧКОЎСКУЮ аб’ядноўваюць не толькі цесныя сяброўскія сувязі, але любоў да кветак і ўсяго таго прыгожага, што прыўносіць у наша будзённае жыццё адчуванне свята.
Самы галоўны тавар у іх магазіне – жывыя кветкі. Бо што, як не прыгожы букет, створыць урачысты настрой, стане нагодай для прызнання ў каханні любімай жанчыне, дапоўніць віншаванне з юбілеем, вяселлем ці іншай знакавай падзеяй у жыцці.
– У нас ёсць паслуга дастаўкі букетаў па горадзе, – гаворыць Анастасія Лычкоўская. – Нашы кліенты могуць замовіць іх па любой нагодзе і на любую суму. Калі хтосьці пажадае арыгінальна аформіць букет, і гэта мы зможам! У зімовы час, калі дні такія кароткія, менавіта кветкі падымаюць настрой, упрыгожваюць аднастайныя будні. Асабліва гэта важна для нас, жанчын.
Пачынаць уласную справу Таццяне і Анастасіі прыйшлося з нуля і, канечне, за ўласныя грошы. Жанчыны арэндавалі памяшканне, зрабілі ў ім касметычны рамонт, устанавілі мэблю, неабходнае абсталяванне.
Яшчэ адным важным момантам для праяўлення прадпрымальніцкай ініцыятывы стала тое, што ў гэтай частцы нашага горада няма ніводнай падобнай гандлёвай кропкі.
Таццяна і Анастасія жанчыны вельмі творчыя. Увесь іх гандлёвы аб’ект вытрыманы ў белых і бэзавых колерах. Як сцвярджаюць гаспадыні, спалучэнне гэтых колераў паляпшае ў наведвальнікаў настрой.
Акрамя жывых кветак у магазіне прадаюцца кветкі ў вазонах, пасцельная бялізна, аксесуары для мужчын і жанчын, падарункі, упрыгожанні, цацкі, сувеніры.
Прадаўцы ахвотна падкажуць ідэю падарунка, дапамогуць з выбарам пакупкі.
– Наша галоўная задача – ствараць для людзей атмасферу свята, – дадаюць Анастасія і Таццяна. – За невялікі час працы магазіна ў нас з’явіліся пастаянныя пакупнікі. Гэта асабліва надае сіл рухацца далей, рабіць штосьці новае, бо ў нашай сферы дзейнасці прасторы для творчасці амаль што бязмежныя.
Святлана МАГІЛЕЎЧЫК.
Фота аўтара.