Нават падлогу вынеслі!
Калі пакаранне даражэй за выгоду. Раней судзімы жыхар з в. Лісаўка выламіў дзверы ў доме пенсіянера в. Малая Машчаніца і прыбраў да рук 10 рублёў, па два пачакі цыгарэт і запалак. Узбуджана крымінальная справа.
П’яныя нягоднікі. 26 лютага апоўдні ў АДС РАУС паступіў званок ад прыбіральшчыцы кафэ “Руская тройка”. Жанчына паскардзілася, што не можа патрапіць у памяшканне, паколькі трое маладых людзей увайшлі туды і зачыніліся знутры. За дробнае хуліганства на раней судзімага мясцовага прадпрымальніка складзены адміністрацыйны пратакол.
Асабліва злоснае хуліганства. Менавіта па гэтым артыкуле Крымінальнага кодэкса ўзбуджана справа ў адносінах да 38-гадовага беспрацоўнага бялынічаніна. Позна вечерам 26 лютага ён пранік у двор пенсіянера, што па вул. Заводская, і нанёс гаспадару домаўладання ўдар па кісці рукі. Пасля таго, як паранены зачыніўся ў хаце, зламыснік табурэткай разбіў ваконнае шкло ў верандзе.
Ну, хоць сцены пакінулі. Пенсіянер з райцэнтра паскардзіўся міліцыянерам, што невядомыя з красавіка па жнівень мінулага года лазілі праз вакно ў яго хату ў в. Малая Машчаніца і вынеслі адтуль два металічныя ложкі, халадзільнік, газавую і чугунную пліты. А за зіму, што толькі паспела скончыцца, скралі 0,54 м3 дошкі для падлогі. Узбуджана крымінальная справа.
Малалетнія зладзюжкі. Двое сямікласнікаў з райцэнтра скралі ў магазінах райспажыўтаварыства блок цыгарэт “Вінстан”, па слоіку энергетычнага напітку “Рэдбул” і глазураваным сырку на кожнага. Праверку праводзіць ІСН РАУС.
П’яныя ногі не ўтрымалі. У першы дзень вясны каля гадзіны ночы ў райаддзел міліцыі паступіла паведамленне бялынічаніна аб тым, што каля яго дома па вул. Набярэжная ў стане алкагольнага ап’янення на зямлі ляжыць жанчына. У адносінах да беспрацоўнай 35-гадовай жыхаркі райцэнтра складзены адміністрацыйны пратакол.
Вольга НАБОКАВА.