Інтэрнат не будзе пуставаць
Жыхары райцэнтра ўжо не адзін месяц назіраюць, як змяняюцца Бялынічы да будучага свята – ХХVІІ Дня беларускага пісьменства.
Многія аб’екты літаральна на вачах перажываюць маштабную рэканструкцыю. Не абмінулі змены і будынак інтэрната былога ПЛ № 17, што па вуліцы Мічурына.
Па інфармацыі дырэктара КУДП “Упраўленне капітальным будаўніцтвам Бялыніцкага раёна” Андрэя ЕРАШЭНКІ, гэты аб’ект увайшоў у абласную інвестыцыйную праграму. На рэканструкцыю інтэрната выдзелена каля 3 млн рублёў. Там будзе праведзена поўная перапланіроўка пад кватэры, якія атрымаюць статус арэнднага жылля. Запланаваны таксама работы па ўцяпленні фасада, прыбудова лоджый, рэканструкцыя даху і добраўпарадкаванне прылеглай тэрыторыі.
Тэндар на правядзенне работ выйграла ААТ “Прамжылбуд” г. Магілёва. Майстар будаўніча-мантажных работ таварыства Сяргей ІГНАТОВІЧ інфармуе, што ў верасні бягучага года дом будзе здадзены ў эксплуатацыю.
– Цяпер ідзе пракладка неабходных інжынерных камунікацый, на цеплатрасе, напрыклад, састарэлыя трубы цепласеткі замяняюцца на сучасныя эканамічныя ПІ-трубы. Паралельна з гэтым вядзецца ўцяпленне фасада, узвядзенне ўнутраных сцен і перагародак. На чарзе – рэканструкцыя даху.
Адначасова з гэтымі работамі працаўнікі Круглянскай ПМК № 266 вядуць пракладку веладарожкі і тратуара.
Усяго ў будынку інтэрната будуць зроблены 59 адна- і двухпакаёвых кватэр з аддзелкай “пад ключ”.
Святлана МАГІЛЕЎЧЫК.
Фота аўтара.
