“З людзьмі заўсёды можна знайсці паразуменне”, – упэўнена старшыня Лебядзянкаўскага сельсавета Вольга МАРДАЧОВА.

Аб тым, чым жыве гэты орган мясцовага самакіравання і што хвалюе вяскоўцаў сёння, Вольга Іванаўна распавяла карэспандэнту раённай газеты.

– Роля сельскіх Саветаў у жыцці вясковага насельніцтва заўсёды была даволі вялікая і цяперашні час – не выключэнне. Вам як старшыні даводзіцца быць і кантралюючым органам, і выканаўцай, а яшчэ…

– …Дарадцай, справаводам, рабочым і нават у нейкім сэнсе суддзёй. Такія гісторыі, калі не мірацца суседзі, у нашым сельсавеце здараюцца нярэдка. Спрабуючы прымірыць канфліктуючыя бакі, ты павінен усебакова вывучыць праблему, знайсці правільныя шляхі яе вырашэння і пры гэтым прытрымлівацца заканадаўства. З другога боку, вельмі шкада людзей, якія распачынаюць сваркі літаральна на пустым месцы.

– Лебядзянкаўскі сельсавет не самы вялікі па тэрыторыі і не густанаселены. Чым жыве зараз гэты куточак Бялыніччыны?

– У нас налічваецца 18 населеных пунктаў. Напачатку года ў іх пражывала крыху больш за 890 чалавек. Прычым, 4 вёскі і пасёлкі амаль нежылыя.

Тое, што сельскае насельніцтва паступова змяншаецца, безумоўна, сумны факт. Сёлета ў сувязі з аптымізацыяй закрываецца Лебядзянкаўскі ВПК  ДС ПШ і паўстала пытанне, дзе размясціць бібліятэку і ФАП, якія дагэтуль знаходзіліся ў будынку. Для бібліятэкі знайшлося месца ў памяшканні сельсавета, дзе яна была раней. Пад ФАП, як варыянт, знайшлі прыватны дом, абсталяваны неабходнымі камунальнымі камунікацыямі. Але сутыкнуліся з праблемай пераводу жылля ў памяшканне грамадскага карыстання. Нядаўна агучыла гэта пытанне на сустрэчы губернатара Леаніда ЗАЙЦА з бялынічанамі. Ён паабяцаў дапамагчы.

Яшчэ адна праблема – рамонт дарогі да вёскі Барок. Па ёй некалькі разоў на тыдзень ходзіць рэйсавы аўтобус, асфальтавае пакрыццё знаходзіцца не ў самым лепшым стане. Жыхары навакольных вёсак неаднойчы звярталіся ў сельсавет і райвыканкам. Зараз спрабуем вырашыць і гэту праблему.

– Нашу краіну чакае важная грамадская падзея – выбары Прэзідэнта. Як адносяцца да яе вяскоўцы?

– На тэрыторыі нашага сельсавета знаходзяцца 2 участкі для галасавання: у аграгарадку Свяцілавічы і ў в. Лебядзянка. Выбарчая актыўнасць жыхароў заўсёды высокая, бо да праяўлення сваёй грамадзянскай пазіцыі яны адносяцца з вялікай увагай. У бягучай выбарчай кампаніі, напрыклад, да нас паступіла некалькі зваротаў ад дачнікаў, якія прыехалі ў сельскую мясцовасць на сезон, каб ім прадаставілі магчымасць прагаласаваць па месцы знаходжання. І яны былі ўключаны ў спісы выбаршчыкаў. Для тых вяскоўцаў, хто не зможа наведаць стацыянарны выбарчы ўчастак, будзе арганізавана галасаванне на доме.

– Распавядзіце пра ўзаемадзеянне мясцовай улады з жыхарамі сельсавета і арганізацыямі, якія тут размешчаны.

– На тэрыторыі нашага сельсавета знаходзяцца землі ААТ “Бялыніцкае райаграпрамтэхзабеспячэнне”. Раней справы ў гаспадарцы ішлі, так бы мовіць, не вельмі, але сёлета становішча пачало выпраўляцца. Працаўнікі сельгаставарыства ўтрымліваюць у добрым стане свае палі і тэрыторыю вакол іх, навялі парадак на тэрыторыі МТК “Прыхабы”, дапамаглі добраўпарадкаваць могілкі ў Свяцілавічах. Напярэдадні Дня Незалежнасці звярталася да іх з просьбай дапамагчы абкасіць тэрыторыю вакол мемарыяльнага комплексу “Стэфанова”. Яны не адмовілі.

Увогуле, самай важнай функцыяй мясцовай улады лічу цеснае ўзаемадзеянне з людзьмі. Калі звяртаюся да вяскоўцаў з просьбамі аб дапамозе, напрыклад, побач з уласным домаўладаннем абкасіць траву на тэрыторыі грамадскага карыстання ці смецце прыбраць, яны не адмаўляюцца гэта зрабіць.

Адзначу грамадзянскую актыўнасць жыхароў вёсак Гута і Студзёнкі. У лютым жыхары Гуты талакой пабудавалі агароджу вакол вясковых могілак. Гэта была іх ініцыятыва, якую сельскі Савет падтрымаў. У Студзёнках вяскоўцы па ўласным жаданні адрамантавалі калодзеж, пафарбавалі і паставілі побач з ім лавачку.

Усе мы разумеем, што грошы з неба не падаюць, але шмат чаго можна паспяхова зрабіць на месцы, калі аб’яднаць свае магчымасці, сілы і жаданні.

             Гутарыла Святлана МАГІЛЕЎЧЫК.

             Фота аўтара.

 

 

 

Print Friendly, PDF & Email