Прафілактыка наркаманіі, тытунекурэння, алкагалізму і іншых залежнасцей з’яўляецца прыярытэтным напрамкам у выхаваўчай рабоце супрацоўнікаў РАУС.
З мэтай прафілактыкі распаўсюджвання курыльных сумесяў і псіхатропных рэчываў у СШ №1 імя М.І. Пашкоўскага прайшло інфармацыйна-асветніцкае мерапрыемства для падлеткаў.
Перад школьнікамі выступіў першы намеснік начальніка РАУС Аляксандр ДРАЗДОЎ з лекцыяй пра шкоду і наступствы ўжывання наркотыкаў і псіхатропаў.
– Варта ведаць, што легальных або не забароненых наркотыкаў, у тым ліку курыльных сумесяў на тэрыторыі Беларусі няма! На асобных сайтах у інтэрнэце паказана, што курыльная сумесь легальная – гэта няправільная інфармацыя, – падкрэсліў Аляксандр Міхайлавіч.
Таксама Аляксандр Драздоў нагадаў аб адміністрацыйнай і крымінальнай адказнасці за ўжыванне і продаж забароненых рэчываў.
Напрыклад, за продаж наркотыкаў і псіхатропаў, згодна з арт. 327 КК Беларусі, пагражае пакаранне ў выглядзе пазбаўлення волі да 25 гадоў. А за ўжыванне наркатычных рэчываў, згодна з арт. 328-2 КК Беларусі, можна атрымаць 2 гады турмы.
Старшы оперупаўнаважаны групы па наркакантролі і супрацьдзеянні гандлю людзьмі РАУС Ігар БАРАНЧУК заклікаў падлеткаў памятаць аб адміністрацыйнай адказнасці, якая пагражае кожнаму, хто вырашыць вырошчваць на агародзе забароненыя рэчывы, у тым ліку мак. За гэта прадугледжаны арт. 16.1 КаАП Беларусі, згодна з якім пасеў і вырошчванне забароненых раслін караецца штрафам у памеры да 20 бв.
Аліна ЦЫГАНІЙ.
