У верасні бягучага года змянілася арганізацыя правіл дарожнага руху па вуліцы Мічурына райцэнтра.
У прыватнасці, на скрыжаванні з вуліцай Якубоўскага з’явіўся светлафор, які зараз рэгулюе дарожны рух каля СШ № 2, інтэрната ПМК-241 і жылых дамоў.
– З вучнямі і педагогамі абедзьвюх школ былі праведзены інфармацыйна-прафілактычныя гутаркі, патлумачаны ПДР і адказнасць за іх невыкананне, – распавёў карэспандэнту райгазеты інспектар АДАІ РАУС Яўген Старавойтаў. – Але калі пешаходы адказна аднесліся да новаўвядзенняў, некаторыя вадзіцелі не жадаюць мяняць свае звычкі і імчаць на чырвонае святло.
За парушэнне патрабаванняў сігналаў рэгулявання дарожнага руху па ч 1 арт. 18.14 КаАП да адміністрацыйнай адказнасці з пачатку верасня быў прыцягнуты 1 вадзіцель.
Паважаныя вадзіцелі і пешаходы! Будзьце ўважлівымі пры руху ў горадзе, звяртайце асаблівую ўвагу на знакі і сігналы светлафораў, строга выконвайце правілы дарожнага руху!
Святлана МАГІЛЕЎЧЫК.
Фота аўтара.
