Сёлетні сезон уздыму захворванняў на вострыя рэспіраторныя інфекцыі і грып будзе абцяжараны каранавіруснай інфекцыяй. Як знізіць рызыку заражэння вірусамі, якая карысць ад прышчэпак і якая сітуацыя з COVID-19 у раёне? Гаворым пра гэта з Анастасіяй КАЧАНАВАЙ, урачом-інфекцыяністам ЦРБ.

– Калі чакаецца магчымы пік захворванняў на грып, вірусныя і рэспіраторныя інфекцыі?

– Часцей за ўсё ён прыпадае на канец студзеня – пачатак лютага, хоць бываў і ў сакавіку. На каранавірус, дарэчы, людзі хварэюць ужо зараз. Таму вельмі складана спрагназаваць, як будзе развівацца сітуацыя. Няма назіранняў у дынаміцы за тым, як паводзіць сябе каранавірусная інфекцыя. Адпаведна, ёсць асцярога, што на яе можа “накласціся” грып і мутаваць. Наступствы таксама прадбачыць складана. Інфекцыі гэтыя ў нечым падобныя, абедзве могуць даць сур’ёзныя ўскладненні, перш за ўсё на дыхальную і сардэчна-сасудзістую сістэмы, ныркі. І ўсё ж варта прызнаць, што каранавірус больш суровы.

– Які быў узровень захворвання ў раёне на ВРЗ у мінулым сезоне?

– Летась вострых рэспіраторных вірусных інфекцый зафіксавалі 210 выпадкаў, што лічыцца ў межах дапушчальнага. Магчыма, паўплывала тое, што ў нашым раёне было прышчэплена больш за 40% жыхароў. Насельніцтва стала больш дасвечаным па пытаннях вакцынацыі.

– Наколькі прышчэпка надзейная як абарона ад інфекцый і вірусаў?

– Вельмі надзейная, яе карысць складана пераацаніць. Нездарма сёння вучоныя ўсяго свету занятыя распрацоўкай вакцыны ад каранавіруса. Ёсць медыцынская статыстыка па грыпу, якая добра паказвае карысць прышчэпкі. У 2019 годзе вакцынацыя дазволіла прадухіліць у нашай краіне больш за 140 тысяч выпадкаў захворванняў, у тым ліку каля 17 тысяч – ва ўскладненай форме. У гэтым годзе мы распачалі вакцынацыю ад грыпу раней традыцыйных тэрмінаў у сувязі з неспрыяльнай эпідсітуацыяй па COVID-19. Пасля прышчэпкі павінен прайсці пэўны час – мінімум, два тыдні, каб у арганізме выпрацаваліся антыцелы, сфармаваўся ўстойлівы імунітэт супраць грыпу. Толькі пасля гэтага чалавек будзе гатовы сустрэць хваробу ў поўным узбраенні. Тое, што вакцына ад грыпу дапаможа не заразіцца COVID-19, нельга сцвярджаць. Але з усёй адказнасцю можна сказаць, што ў выпадку заражэння каранавірусам прышчэплены перанясе яго з найменшымі наступствамі. Таму што арганізм яго не будзе настолькі пашкоджаны, як у чалавека, хворага на грып. І, вядома ж, не трэба забываць аб магчымых сумных наступствах ад заражэння каранавіруснай інфекцыяй і грыпам адначасова.

– Якія вакцыны выкарыстоўваюцца ў гэтым сезоне?

– На дадзены момант у арсенале нашай медустановы расійская вакцына “Грыпол Плюс” і французская “Ваксігрып”. Абедзве яны эфектыўныя і прайшлі выпрабаванні ў Беларусі, некалькі сезонаў запар мы выкарыстоўваем іх у нашым раёне. Вакцынацыя праводзіцца ў ЦРБ і ў сельскай мясцовасці – у амбулаторыях. Прэпаратам “Грыпол Плюс” можна прышчапіцца бясплатна. “Ваксігрып” – толькі за грошы.

– У любога, нават самага лепшага ў свеце, прэпарата ёсць супрацьпаказанні. Каму ўсё ж нельга рабіць прышчэпкі?

– Вакцынацыя проціпаказаная тым, у каго ёсць алергічныя рэакцыі на курыны бялок і кампаненты прэпарата, а таксама на раней уведзеныя грыпозныя вакцыны. Нельга прышчапляцца пры вострых ліхаманкавых станах, абвастрэнні любой хранічнай хваробы (пасля абвастрэння або ў перыяд рэмісіі – дазваляецца). Таксама прышчэпку нельга рабіць пры цяжкіх вострых рэспіраторных вірусных і кішачных захворваннях. І цяжарным у першым трыместры. У любым выпадку вакцынацыя – гэта сур’ёзнае пытанне. І перш чым зрабіць прышчэпку, трэба абавязкова пракансультавацца з урачом.

– Актуальнай праблемай для нашага раёна і краіны ў цэлым застаецца распаўсюджванне каранавіруснай інфекцыі.

– Такая тэндэнцыя характэрная для ўсёй краіны. Але ўдакладню, што выпадкаў каранавіруса стала больш у верасні і кастрычніку ў параўнанні са жніўнем, пры гэтым, іх менш чым фіксавалася ў пачатку лета. За, скажам так, непрацяглы час перадышкі наша медустанова ўмацавалася ў пытаннях дапамогі пацыентам і аховы медперсаналу, што таксама вельмі важна. На дадзены момант праходзяць лячэнне амбулаторна 45% захварэлых на COVID-19, у іх лёгкае цячэнне хваробы. 55% – лечацца стацыянарна, у іх сярэдне-цяжкі стан. У рэанімацыі няма ніводнага чалавека з кавідам.

– Наколькі актуальныя цяпер часнок, цыбуля, лімон і іншыя натуральныя абаронцы ад сезонных хвароб, калі побач знаходзяцца грып і каранавірус?

– Калі няма ніякіх супрацьпаказанняў, абмежаванняў і індывідуальнай неперанасімасці, то ўсё гэта, безумоўна, карысна. Відавочная іх карысць для здаровага ладу жыцця ў цэлым. У перыяд абвастрэння эпідсітуацыі трэба аддаваць перавагу якаснаму харчаванню, выконваць водны баланс, варта арганізоўваць аптымальны рэжым бадзёрасці, сну і адпачынку, разумнай фізічнай нагрузкі, не забываць пра прагулкі на свежым паветры. Напярэдадні халоднага сезона (для распаўсюджвання вірусаў асабліва падыходзіць сырое, слотнае надвор’е) расслабляцца не варта.

Самае галоўнае, каб усе зразумелі: наша здароўе ў першую чаргу залежыць ад нас саміх, і мы самі павінны пра сябе паклапаціцца.

– Анастасія Віктараўна, на што вы хацелі б звярнуць увагу жыхароў раёна?

– Зараз людзі ўсё часцей сталі ігнараваць элементарныя меры абароны ад кавіднай інфекцыі, што выклікае занепакоенасць. У раёне ўведзены масачны рэжым, але насельніцтва пачало забываць пра ўласную бяспеку, многія не носяць маскі ў грамадскіх месцах. Як паказвае прыклад шэрагу замежных краін, каранавірус зноў ідзе ў наступленне. Цяпер проста неабходна максімальнае выкананне мер засцярогі ад віруса.

                        Дзмітрый ЦІХАНАЎ.

                        Фота аўтара.