Прозвішча брыгадзіра брыгады па працаёмкіх працэсах СВК «Калгас «Радзіма» Дзмітрыя ГЕРЧУКА добра вядома чытачам нашай газеты.

У пару жніва ён разам з калегамі займаецца падпрацоўкай зерня новага ўраджаю на КЗС у вёсцы Карпаўка.

Некалькі гадоў запар звяно аператараў зернятока, якое ўзначальвае Дзмітрый Вітальевіч, займае самыя высокія месцы ў раённым працоўным спаборніцтве, саступаючы хіба што звяну суседняга КЗС на чале з брыгадзірам і сябрам Юрыем КАЛАКУСТАВЫМ. Летась, дарэчы, дружны квартэт у складзе Дзмітрыя Герчука, Васіля ДЗЕВІЧЫНСКАГА, Сяргея ПРАКОПЧЫКАВА і Алега МУШКЕТАВА заняў трэцяе месца ў Магілёўскай вобласці ў спаборніцтве сярод аператараў зернесушыльных установак.

Дзмітрый Герчук працуе ў СВК «Калгас «Радзіма» з 2003 года. Яго бацька Віталь Васільевіч шмат гадоў адрабіў у гэтай гаспадарцы зваршчыкам. Да сваёй справы далучыў і сына. Дзмітрый адзначае, што яму пашанцавала з настаўнікамі. Дапамагла не толькі бацькава навука, але яшчэ карысныя парады ад інжынера Аляксандра БАРТЫЛЁВА, галоўнага энергетыка Мікалая КАПЕЛЮША.

Зараз ужо Дзмітрый, як брыгадзір, арганізуе рабочы працэс, калі трэба, вучыць і падтрымлівае парадай маладых работнікаў.

– Прыемна бачыць, што нашу брыгаду папаўняе моладзь, – гаворыць Дзмітрый. – Да нас прыйшлі маладыя спецыялісты, якія сапраўды цікавяцца сваёй справай, унікаюць у рабочы працэс. Гэта браты Віталь і Канстанцін КЛІМОВІЧЫ, адпаведна, інжынер па працаёмкіх працэсах і энергетык, зваршчык Антон СУРВІЛА. Тым больш, абавязкаў у нас вельмі многа. Брыгада забяспечвае бесперабойную працу на 9 жывёлагадоўчых аб’ектах, абслугоўвае 19 артсвідравін. Фермы і комплексы гаспадаркі маюць пастаянную патрэбу ў вадзе, а даільнае абсталяванне павінна працаваць не горш за швейцарскі гадзіннік. Любы прастой прыводзіць да значных страт, таму ліквідоўваць няспраўнасці стараемся як мага хутчэй і не лічымся з уласным часам.

Таксама без работнікаў брыгады па працаёмкіх працэсах не абыходзіцца ніводная будоўля ў гаспадарцы, адказваюць яны і за працу лініі па перапрацоўцы рапсу, дрэваапрацоўку.

Дзмітрый Вітальевіч упэўнены: паспяховай працы кожнага структурнага падраздзялення спрыяюць зладжанасць і сістэмнасць, а таксама пісьменнае кіраванне. Сваімі словамі ён яшчэ раз пацвярджае правільнасць дзеянняў кіраўніцтва СВК «Калгас «Радзіма», якое заўсёды прыслухоўваецца да рацыянальных прапаноў калгаснікаў. Так, напрыклад, ідэю перапрацоўваць рапс на алей прапанавалі менавіта працаўнікі брыгады. Яны ж і наладзілі абсталяванне. Зараз рапсавая лінія дае ў касу гаспадаркі адчувальную грашовую выручку.

– У нашым калектыве створаны спрыяльны мікраклімат, – распавядае Дзмітрый Герчук. – Кожны, хто добра працуе, атрымлівае дастойную зарплату. У мяне ёсць надзейны тыл, дзеля якога заўсёды гатовы старацца, – гэта жонка Наталля і дачка Аліна. Жонка працуе бібліятэкарам, а дачка вучыцца ў МДУ імя А.А.Куляшова. Яна выбрала для сябе прафесію настаўніцы малодшых класаў і   ўсур’ёз задумваецца пачаць сваю працоўную дзейнасць на малой радзіме.

Святлана МАГІЛЕЎЧЫК.

Фота з архіва
Дзмітрыя Герчука.