Вадзіцель Анатоль ГАРБУЗАЎ шчыруе ў ААТ «Бялынічы» больш за 20 гадоў.
За час сваёй працы Анатоль Анатольевіч «накруціў» па мясцовых дарогах сотні тысяч кіламетраў. Вясной ён падвозіць ваду да агрэгатаў хімапрацоўкі, улетку заняты на нарыхтоўцы сенажу і жніве, а пасля, амаль усю восень, перавозіць кукурузную масу на сілас і зерне.
Як чалавек вельмі сціплага складу характара ў сваіх высокіх працоўных дасягненнях руплівец не бачыць асаблівага гераізму. Адказнасць і стараннасць – вось галоўныя складнікі яго працоўных перамог. А яшчэ …дзеці! Калі размова заходзіць пра сям’ю, твар Анатоля Гарбузава святлее. Разам з жонкай Наталляй Пятроўнай яны выхоўваюць чацвёра сыноў і дзвюх дачушак. Старэйшая ўжо, так бы мовіць, на сваім хлебе, працуе лесніком у ДЛГУ «Бялыніцкі лясгас». Малодшыя пакуль засвойваюць школьныя навукі. Але і дамашніх абавязкаў не цураюцца. Сям’я трымае вялікую дапаможную гаспадарку: каня, карову, свіней, птушку… Кожны выконвае пасільную працу, тым больш, перад іх вачыма прыклад бацькі, які паспявае і ў таварыстве, і дома.
– Анатоль Гарбузаў – прыкладны сем’янін і адказны працаўнік, – гаворыць старшыня прафсаюзнай пярвічнай арганізацыі ААТ «Бялынічы» Тамара ЛАРКОВА. – Ён падае добры прыклад маладзейшым калегам. Неаднаразова Анатоль Анатольевіч уваходзіў у лік пераможцаў раённага спаборніцтва па дасягненні высокіх паказчыкаў на ўборцы ўраджаю зерня і зернебабовых культур. А сёлета заслужана заняў у ім І месца! На грузавым аўтамабілі МАЗ 555 ён перавёз ад камбайнаў больш за 1700 тон збожжа новага ўраджаю.
Святлана МАГІЛЕЎЧЫК.
Фота аўтара.
