Нядбалае стаўленне да жыцця прыводзіць да трагедыі

Пажар нярэдка называюць бядой, і той, каму давялося перажыць такое няшчасце, не можа не пагадзіцца, што гэта сапраўды так. Ланцужок «чарка, сон з цыгарэтай у руцэ» звычайна заканчваецца трагічна.

Нават пры невялікіх памерах пажару ў падпітых і курцоў у ложку мала шанцаў на выратаванне, бо значная частка прадметаў пры гарэнні вылучае таксічныя рэчывы, якія выклікаюць атручванне. Для папярэджання пажараў і гібелі ад іх людзей задзейнічаюцца ўсе суб’екты прафілактыкі, якія штогод праводзяць абследаванне ўсіх домаўладанняў і кватэр, але па асобных катэгорыях.

Работнікамі ўпраўлення па працы, занятасцi i сацыяльнай абароне райвыканкама праводзіцца абследаванне і навучанне правіл пажарнай бяспекі пажылых грамадзян. Супрацоўнікі аддзела па адукацыі праводзяць прафілактычную працу ў кожным домаўладанні, дзе выхоўваюцца дзеці ва ўзросце ад 3 да 14 гадоў, унутраных спраў – праводзяць абследаванне домаўладанняў, у якіх жывуць грамадзяне, схільныя да злоўжывання спіртнымі напоямі, і якія знаходзяцца на прафілактычным уліку.

Асноўнымі мэтамі прафілактычных мерапрыемстваў у жыллёвым фондзе з’яўляюцца выяўленне прычын і ўмоў, што спрыяюць гібелі людзей ад знешніх прычын, у тым ліку пажараў і іншых надзвычайных сітуацый і прыняцце неабходных мер, накіраваных на іх ухіленне.

У сувязі з гэтым уладальнікам ці кватэранаймальнікам аднакватэрных блакіраваных дамоў нагадваем:

– не захоўвайце свае рэчы ў паддашкавым памяшканні;

– у якасці ўцяпляльніка столевага перакрыцця не выкарыстоўвайце гаручыя матэрыялы;

– коміны ў межах гарышча трымайце ў спраўным стане;

– упэўніцеся ў адсутнасці размежавальнікаў вакол трубы пры праходзе яе праз перакрыцце і дах;

– пры эксплуатацыі печы сачыце за яе спраўнасцю;

– да пачатку эксплуатацыі і пасля заканчэння ачышчайце коміны ад сажы;

– не ўжывайце для распалкі печаў або ацяпляльных катлоў бензін, газ і іншыя лёгкаўзгаральныя вадкасці;

– не пакідайце печы, якія топяцца, без нагляду і з адкрытымі топачнымі дзверцамі;

– перад топачнай прасторай падлога павінна быць абаронена металічным лістом памерам  50х70 см.;

– сачыце за станам электраправодкі і не хавайце яе пад шпалерамі;

– не дапускайце выкарыстанне электраправодкі з пашкоджанай ізаляцыяй;

– не дапускайце прымяненне засцерагальнікаў саматужнага вырабу;

– не пакідайце без нагляду ўключаныя тэлевізары, электрапрасы, чайнікі, пліты і г.д.

Пры выяўленні пажару неадкладна паведаміце ў РАНС па тэлефонах 101 або 112 і прыміце меры па выратаванні людзей і тушэнні пажару наяўнымі сродкамі.

Калі вы не хочаце папоўніць трагічны спіс ахвяр пажараў, калі шануеце сваё жыццё і жыццё сваіх блізкіх, не праяўляйце нядбайнасці ў абыходжанні з агнём пры курэнні.

   Юрый МАРОЗАЎ,

   старшы інспектар ІНіП РАНС.                            

 

Print Friendly, PDF & Email