У самы змрочны час года, калі позна світае, рана цямнее і нават днём даводзіцца карыстацца электрычнасцю для асвятлення памяшканняў, сваё прафесійнае свята адзначылі тыя, хто дорыць нам святло, – энергетыкі. Менавіта цяпер, як ніколі, прыгожа на вуліцах горада і вёсак: сотнямі рознакаляровых лямпачак зіхацяць упрыгожаныя ёлкі і навагоднія ілюмінацыі ў вокнах дамоў, кватэр, арганізацый, казачна пераліваюцца электрагірлянды.

Настрой у энергетыкаў раёна святочны і адначасова засяроджана-дзелавіты: трэба быць нагатове, каб непаладкі ў энергасістэме не азмрочылі людзям навагоднія і калядныя святы. Аб буднях людзей, якія ў сілу сваёй прафесіі забяспечваюць насельніцтву раёна жыццёвы камфорт, карэспандэнт раённай газеты пагутарыў з начальнікам Бялыніцкага раёна электрычных сетак Сяргеем МАРДАЧОВЫМ.

–  З энергетыкай Вы звязаны амаль усё жыццё, так?

– Сваю працоўную дзейнасць у РЭСе пачаў з 18 гадоў. Першапачаткова быў электраманцёрам выязной брыгады, пасля пабываў на розных пасадах, азнаёміўся з усімі тонкасцямі прафесіі. З 2015 года прызначаны начальнікам РЭС.

– Якія задачы Вашым работнікам прыходзіцца выконваць штодзень?

– Асноўныя – гэта капітальны рамонт паветраных ліній электраперадачы і трансфарматарных падстанцый, выкананне плана па барацьбе са стратамі электраэнергіі ў электрычных сетках. Гэта і якаснае, бесперабойнае электразабеспячэнне спажыўцоў, захаванне жыцця і здароўя нашых работнікаў. Да нашай працы прад’яўляюцца павышаныя патрабаванні бяспекі. Акрамя электратраўматызму, існуюць разнастайныя рызыкі, звязаныя з працай грузапад’ёмных машын, работай на вышыні і многае іншае. А задача начальніка РЭС – арганізаваць складаны арганізм, якім з’яўляецца раён энергетычных сетак, для бесперабойнай і зладжанай працы.

– Прафесійнае свята энергетыкі адзначаюць напрыканцы снежня, калі ўжо бачныя вынікі вытворчай дзейнасці. Раскажыце, калі ласка, з якімі паказчыкамі падышоў калектыў раёна электрычных сетак да Дня энергетыка?

– Усе запланаваныя мерапрыемствы на 2020 год выкананы. Напрыклад, сіламі нашай арганізацыі ў раёне ў гэтым годзе быў зроблены капітальны рамонт ВЛ 0,4-10кВ працягласцю 111,1 км. У населеных пунктах цалкам заменены індукцыйныя і электронныя лічыльнікі на новыя аўтаматызаваныя сістэмы кантролю ўліку электраэнергіі, якія дазваляюць устанаўліваць час працы вулічнага асвятлення дыстанцыйна, з месца працы дыспетчара РЭС. Пабудаваны новыя электрычныя сеткі ў зоне жылых забудоў у населеных пунктах Карманоўка і Рафалава. У Бялынічах – на вуліцах Абаронная і Чапаева.

– Якія цяжкасці адчуваюць энергетыкі ў працы?

– Электраманцёры працуюць у асноўным на вуліцы і ў паходна-палявых умовах. Іх праца ўскладняецца, перш за ўсё, прыроднымі фактарамі, неспрыяльныя ўмовы надвор’я – пастаянныя спадарожнікі электрыкаў. Ва ўмовах непагадзі ва ўсіх нас працы прыкметна дадаецца, паколькі ліквідаваць аварыі і паломкі трэба ў самыя кароткія тэрміны. У такія моманты ў ліквідацыю аварый уключаюцца ўсе работнікі. Людзям патрэбна святло ў любое надвор’е і ў любы час дня і ночы.

– У такіх умовах, відавочна, варта лішні раз нагадаць работнікам выязных брыгад аб неабходнасці строга выконваць патрабаванні аховы працы.

– Ахове працы ў нас пастаянна надаецца вялікая ўвага. Персанал на 100% забяспечаны звычайнай і ахоўнай спецвопраткай, сродкамі абароны. У нас існуе такое паняцце, як калектыўная адказнасць за бяспеку: пры выкананні работ усе члены брыгады павінны назіраць адзін за адным. Людзі прыходзяць на працу са сваімі праблемамі, перажываннямі, у розным душэўным стане. А працаваць ім даводзіцца на дзеючых электраўстаноўках. Важна своечасова заўважыць дрэнны настрой таварыша па брыгадзе, адчуць яго перажыванні, якія могуць адмоўна адбіцца на канцэнтрацыі ўвагі. Ток смяротна небяспечны: ён не бачны, не мае паху. Толькі строгае захаванне працоўнай дысцыпліны можа зберагчы чалавека нашай прафесіі ад няшчасця.

– У Вашай дзейнасці, як і ў любой іншай, усё вырашаюць людзі. Што можна сказаць аб кадрах энергетыкаў?

– У Бялыніцкім раёне электрасетак працуюць 68 чалавек. Гэта ўсе дастойныя і адказныя спецыялісты. Разумею, што падчас прафесійнага свята прынята адзначаць лепшых працаўнікоў калектыву. Але вылучыць кагосьці вельмі складана, усе – прафесіяналы сваёй справы. Нават калі чалавек скончыў універсітэт або каледж, калі ўжо мае вопыт, уладкоўваючыся на работу ў РЭС, ён абавязкова праходзіць адмысловую перападрыхтоўку. У нашай арганізацыі свая спецыфіка і патрабаванні.

Хацеў бы спыніцца на работніках, якія цяпер на пенсіі, некаторыя з іх маюць ганаровае званне «Ветэран беларускай энергетыкі». Гэта Уладзімір ЕРАШЭНКА, Мікалай АРЛОЎСКІ, Аляксандр КАЗЛОЎСКІ.

– Дзякуй, Сяргей Віктаравіч.

        Гутарыў  Дзмітрый ЦІХАНАЎ.

            Фота аўтара.