Вынікамі дзейнасці супрацоўнікаў пракуратуры за мінулы год, а таксама планамі на бягучы з карэспандэнтам «Зары над Друццю» падзяліўся пракурор раёна, саветнік юстыцыі Віталь КАВАЛЁЎ.

– Раскажыце падрабязней аб стане злачыннасці ў раёне.

– У выніку нашай сумеснай дзейнасці з вышэй названымі службамі не былі дапушчаны забойствы, разбоі, вымаганні, згвалтаванні і іншыя злачынствы супраць палавой недатыкальнасці, скарацілася колькасць цяжкіх і асабліва цяжкіх злачынстваў.

На 6,4% зменшылася колькасць злачынстваў, зробленых раней судзімымі. У той жа час крымінагенная абстаноўка на тэрыторыі раёна ў мінулым годзе характарызавалася шэрагам негатыўных тэндэнцый. Агульная колькасць злачынстваў павялічылася на 9,8%. Каэфіцыент злачыннасці на 10 тыс. насельніцтва склаў 113,3. Істотна ўзрасла колькасць злачынстваў, зробленых у стане алкагольнага ап’янення, у грамадскіх месцах, групай асоб, а таксама рабаванняў, крадзяжоў і інш. Назіраўся значны рост злачынстваў у сферы высокіх тэхналогій.

На працягу 2 апошніх гадоў зніжаецца ўзровень раскрывальнасці злачынстваў, які ў 2020 годзе склаў 67,6%.

– На чым, на Ваш погляд, трэба засяродзіць больш увагі сёлета, каб палепшыць сітуацыю з крымінагеннай абстаноўкай у раёне?

– Негатыўным зменам у структуры і дынаміцы злачыннасці спрыялі недахопы і хібы ў працы суб’ектаў прафілактыкі правапарушэнняў.

Напрыклад, праведзеным пракуратурай аналізам устаноўлена, што ў шэрагу выпадкаў неналежная выхаваўчая праца з асобамі, якія знаходзіліся на прафілактычных уліках РАУС, з’явілася адной з умоў, якія садзейнічалі росту злачынстваў у стане алкагольнага ап’янення.

Адным з абавязкаў, ускладзеных на выканаўчыя і распарадчыя органы, з’яўляецца прыняцце мер да працаўладкавання грамадзян, якія вярнулiся са спецыяльных навучальна-выхаваўчых, лячэбна-выхаваўчых і папраўчых устаноў. Разам з тым праверкай устаноўлена, што названыя абавязкі выконваюцца неналежным чынам.

У працы камісіі па каардынацыі работы па садзейнічанні занятасці насельніцтва і назіральнай камісіі райвыканкама выяўлены істотныя недахопы і хібы, якія аказваюць негатыўны ўплыў на стан барацьбы з рэцыдыўнай злачыннасцю.

– Распавядзіце, калі ласка, пра праблему гібелі людзей ад знешніх фактараў. Наколькі яна актуальная для Бялыніччыны?

– Сур’ёзныя нараканні ў гэтым кірунку выклікае прафілактычная дзейнасць дзяржаўных органаў і іншых арганізацый. У 2020 годзе на тэрыторыі нашага раёна адбылося 16 пажараў, колькасць загінулых на іх грамадзян павялічылася з 2 да 3.

З 2 да 6 узрасла колькасць загінулых грамадзян у выніку дарожна транспартных здарэнняў.

– Што робіцца ў арганізацыях раёна па зніжэнні выпадкаў вытворчага траўматызму?

– Выкананне заканадаўства аб ахове працы ў арганізацыях аграпрамысловага комплекса таксама адпавядае не ўсім патрабаванням. Працягваюцца парушэнні заканадаўства аб дарожнай бяспецы ў арганізацыях АПК. У мінулым годзе не дапушчана фактаў гібелі на вытворчасці, адзначаецца зніжэнне з 10 да 6 няшчасных выпадкаў, у тым ліку з 4 да 2 з цяжкім зыходам.

Разам з тым, як паказваюць вынікі нагляднай дзейнасці, у сельскагаспадарчых арганiзацыях не забяспечваецца належным чынам стварэнне бяспечных умоў працы, што патрабуе прыняцця дадатковых мер.

– Не губляюць актуальнасці і пытанні супрацьдзеяння карупцыі. Тым больш, увага стану законнасці ў гэтай сферы зараз надаецца вельмі вялікая.

– У нашым раёне па кірунку барацьбы з эканамічнымі злачынствамі летась былі выяўлены і пастаўлены на ўлік 10 злачынстваў, з іх адно адносіцца да карупцыйных. Парушэнне заканадаўства ў гэтай сферы ўстаноўлена пракуратурай у арганізацыі дарожнага будаўніцтва.

Павышанай рызыкай праяўлення карупцыйных схем характарызуецца і сфера закупак. Арганізацыямі раёна дапускаюцца парушэнні, звязаныя з невыкананнем патрабаванняў заканадаўства аб размяшчэнні інфармацыі аб закупках у адкрытым доступе, няправільным выбарам працэдур закупак, неабгрунтаваным павелічэннем кошту прадметаў закупак, непрыняццем мер па вяртанні неабгрунтавана выдаткаваных бюджэтных сродкаў і іншыя парушэнні.

Большасць эканамічных злачынстваў, якія не адносяцца да карупцыйных, зарэгістраваны ў сферы сельскай гаспадаркі. Гэта сведчыць аб тым, што яна ў найбольшай ступені рэагуе на карупцыйныя рызыкі. Злачынствы ў арганізацыях АПК робяцца ў выніку невыканання элементарных патрабаванняў да захаванасці маёмасці, бескантрольнасці за дзеяннямі адказных работнікаў.

– Якая праца праводзіцца па недапушчальнасці правапарушэнняў сярод моладзі?

– Дзяржаўнымі і грамадскімі фарміраваннямі прымаліся меры, накіраваныя на папярэджанне правапарушэнняў непаўналетніх.

Але ж у 2020 годзе на тэрыторыі раёна непаўналетнія зрабілі 5 злачынстваў, тады як у 2019 годзе іх увогуле зарэгістравана не было. Гэта сведчыць пра сур’ёзныя пралікі ў арганізацыі і правядзенні прафілактычнай работы з вучнямі і іх бацькамі ва ўстановах адукацыі.

Не ў поўнай меры адпавядае гэтым патрабаванням кантроль за выхаваўча-прафілактычнай работай з боку спецыялістаў аддзела па адукацыі райвыканкама. У нашым раёне вядзецца банк дадзеных дзяцей, якія знаходзяцца ў сацыяльна небяспечным становішчы. У пачатку бягучага года ў ім знаходзілася 48 дзяцей.

– Дзякуй, Віталь Мікалаевіч.

Гутарыла Аліна ЦЫГАНІЙ.