Дастаць зорку, або Як становяцца афіцэрамі
Выбар будучай прафесіі – адказны крок у жыцці кожнага чалавека. Рана ці позна гэтае пытанне паўстае перад школьнікамі і іх бацькамі. У пошуках адказу варта прыслухацца да тых, хто ў свой час прыняў правільнае рашэнне, падумаў і вырашыў, у якую вобласць накіраваць свае сілы і таленты.
Ураджэнец Бялыніччыны Рыгор КАРПЯНКОЎ (на здымку) сёлета стаў курсантам Ваеннай акадэміі Рэспублікі Беларусь. Прафесію ён абраў свядома і марыць адбыцца ў ёй як высакакласны спецыяліст. Рыгор вырас у вёсцы Ермалавічы. З дзяцінства захапляўся спартыўнымі гульнямі, неаднаразова выступаў за Вішоўскую СШ, дзе вучыўся, у розных спартыўных спаборніцтвах.
– Я лічу, што ў прафесіі павінна прысутнічаць тое, што табе падабаецца, чым ты захапляешся. У маім выпадку гэта спорт. Зыходзячы з гэтага, разглядаў два ВНУ для працягу вучобы. Гэта факультэт фізічнага выхавання МДУ імя А. А. Куляшова і факультэт унутраных войск Ваеннай акадэміі Беларусі, – распавядае Рыгор Карпянкоў. – У выніку вырашыў звязаць сваё жыццё з акадэміяй. Тут падтрымліваецца і прапагандуецца культ вучобы, спорту і ўсё – на асабістым прыкладзе камандзіраў. Гэта вельмі прыцягвала.
Паступленне ў вышэйшую ваенную навучальную ўстанову кардынальна адрознівалася ад паступлення ў грамадзянскую ВНУ.
Грыша разумеў, што бліжэйшыя 4 гады пройдуць удалечыні ад родных і блізкіх яму людзей. Паводле яго слоў, першы час асабліва складана было прызвычаіцца да строгага распарадку дня, пад’ёму ў 6 гадзін раніцы, строгай дысцыпліне і нарадам. Але без гэтага як стаць ваенным?
Кожны вучэбны дзень у акадэміі пабудаваны даволі насычана, часу на расслабленне практычна няма. Але хлопец разумеў з першых дзён, што без цяжкай працы і ўнутранай самадысцыпліны ніякага поспеху ў вучобе не будзе.
Нягледзячы на гэта, ён адзначае, што жыццё курсанта вельмі разнастайнае, поўнае яркіх падзей, якія кардынальна адрозніваюцца ад звычайнага студэнцкага жыцця.
– Я вучуся толькі паўгода, але адаптацыя прайшла паспяхова. Узвод вельмі дружны, таму – ніякага расчаравання. Усе нацэлены на вынік, дапамагаюць і падтрымліваюць, асабліва камандзіры аддзяленняў. Афіцэры для курсантаў ва ўсім з’яўляюцца прыкладам. Стараемся падцягвацца, раўняцца на іх. У акадэміі моцны выкладчыцкі склад, які дае глыбокія веды па ўсіх дысцыплінах. Ёсць і добрая база для правядзення заняткаў, бібліятэка для самападрыхтоўкі, трэнажорная і спартыўная залы. У вольны час нам арганізоўваюць экскурсіі, наведванне тэатраў, часта бываем на хакейных матчах. Увогуле, не шкадую, што паступіў у Ваенную акадэмію, – падзяліўся ўражаннямі курсант.
Дзмітрый ЦІХАНАЎ.
Фота аўтара.
Ваенны камісарыят Бялыніцкага і Круглянскага раёнаў інфармуе, што праводзіцца адбор кандыдатаў з ліку грамадзянскай моладзі ва ўзросце ад 17 да 21 года, а таксама ваеннаабавязаных з ліку звольненых з тэрміновай ваеннай службы, службы ў рэзерве ва ўзросце да 23 гадоў, для паступлення ў 2021 годзе ў дзяржаўныя ўстановы адукацыі: Ваенную акадэмію; Інстытут пагранічнай службы; на ваенна-медыцынскі факультэт БДМУ; на ваенны факультэт у БДУ; на ваенна-тэхнічны факультэт у БНТУ і інш.
Для абітурыентаў таксама адкрыта магчымасць паступіць у шэраг ваенных навучальных устаноў Міністэрства абароны Расійскай Федэрацыі.
Падрабязную інфармацыю аб правілах прыёму і парадку залічэння ў ВНУ можна атрымаць у ваенным камісарыяце Бялыніцкага і Круглянскага раёнаў і па тэл.: 72-963, 73-108.