Прыём грамадзян і прамую тэлефонную лінію з жыхарамі нашага раёна правёў у сераду дэпутат Палаты прадстаўнікоў Нацыянальнага сходу Беларусі Андрэй ГАНЧУК. 

На прыём да Андрэя Аляксандравіча звярнуўся бялынічанін, які пражывае ў шматкватэрным доме па вуліцы Калініна. Некалькі гадоў таму, як патлумачыў мужчына, у доме пасля 36 гадоў яго эксплуатацыі праводзіўся капітальны рамонт. Перад пачаткам рамонтных работ адбыліся сходы з удзелам жыльцоў, былі адзначаны ўсе хібы, патрабуючыя ліквідавання, у тым ліку шматлікія расколіны на сценах дома. Аднак вынікамі праведзеных работ мужчына застаўся незадаволены. Напрыклад, па прычыне няправільна ўстаноўленых вокнаў ПВХ на лесвічных пляцоўках зімой, асабліва ў моцныя маразы, цяпло выходзіць на вуліцу, а расколіны на сценах так і не былі ліквідаваны.

Раней заяўнік звяртаўся ў жылкамгас, аднак адказ гэтай арганізацыі яго таксама не задаволіў.

Другое пытанне – няякасна ачышчаная летась сцёкавая канава каля сквера «Глінішча». Увесь бруд з яе, замест таго, каб вывезці, камунальнікі выгарнулі і пакінулі каля гэтай жа канавы.

На прамую лінію да дэпутата звярнулася жыхарка в. Станцыя Друць, якая разам са сваімі аднавяскоўцамі хацела б перайсці на электрычнае ацяпленне ў сваім доме, аднак існуючыя ўмовы не дазваляюць гэтага зрабіць, бо дзеючая трансфарматарная падстанцыя не разлічана на патрэбную магутнасць. Жанчына таксама выказала Андрэю Аляксандравічу словы шчырай падзякі за аказаную дапамогу ў вырашэнні пытання па афармленні інваліднасці, і, адпаведна, атрымання пенсіі і дакументаў для далейшага накіравання ў дом­інтэрнат яе сваяка, які на працягу года пасля ампутацыі нагі і знаходжання на сацыяльнай койцы ва ўстанове здароўя, не мог сам аформіць патрэбныя дакументы.

Усе пытанні ўзяты дэпутатам на кантроль, заяўнікі атрымаюць адказы ва ўстаноўлены законам тэрмін.

У гэты ж дзень дэпутат сустрэўся з калектывамі Цяхцінскага ВПКДССШ і Машчаніцкай СШ.

– Для таго, каб прымаемыя законы найбольш адпавядалі патрабаванням сучаснасці, вельмі важная сувязь паміж тымі, хто гэтыя законы прымае, і практыкамі, якія працуюць на месцах, гэта значыць з вамі, – адзначыў, звяртаючыся да настаўнікаў Цяхцінскай установы адукацыі, Андрэй Ганчук.

Гутарка ішла на тэмы найбольш актуальных змен у заканадаўчай базе, а таксама аб паўсядзённых пытаннях, якія сёння хвалююць настаўнікаў. Тычыліся яны падвозу вучняў і настаўнікаў ва ўстановы адукацыі, размешчаныя ў сельскай мясцовасці, арганізацыі дастаўкі педагогаў да вучняў, якія маюць патрэбу ў індывідуальным навучанні, недахопу падручнікаў для настаўнікаў і інш.

 У гутарцы з карэспандэнтам раёнкі Андрэй Аляксандравіч падрабязней спыніўся на плануемых зменах у Кодэкс аб адукацыі.

– Спачатку нагадаю, што старая рэдакцыя гэтага дакумента ўступіла ў сілу ў верасні 2011 года. Унясенне ў яго карэктыў абумоўлена ў тым ліку зменай структуры вышэйшай адукацыі, уключэннем у сістэму адукацыі нашай краіны навукова­арыентаванай адукацыі, пашырэннем сферы прымянення мэтавай падрыхтоўкі спецыялістаў і рабочых, і ўвогуле неабходнасцю ліквідацыі тых недахопаў, якія былі выяўлены ў практыцы прымянення дзеючага Кодэкса.

Так, прапануецца ўвядзенне новай фармуліроўкі «дыстанцыйная форма атрымання адукацыі – від завочнай формы атрымання адукацыі, які ажыццяўляецца пераважна з выкарыстаннем сучасных камунікацыйных і інфармацыйных тэхналогій». Таксама сказана, што адукацыя можа быць атрымана ў вочнай (дзённай, вячэрняй), завочнай, дыстанцыйнай формах атрымання адукацыі і ў форме суіскання». Акрамя таго, дыстанцыйна зараз можна будзе атрымаць не толькі вышэйшую, але і прафесійна­тэхнічную адукацыю, аднак зрабіць гэта змогуць толькі тыя, хто на момант паступлення ўжо скончыў сярэднюю школу.

З артыкула «Установы адукацыі» выключаныя ўстановы прафесійна­тэхнічнай адукацыі, да якіх адносяцца прафтэхліцэі і каледжы. Плануецца пакінуць толькі прафесійныя каледжы, якія будуць рэалізоўваць праграмы прафесійна­тэхнічнай, сярэдняй спецыяльнай і агульнай сярэдняй адукацыі. Гаворка пры гэтым ідзе не столькі аб зліцці саміх устаноў адукацыі, колькі пра аптымізацыю спецыяльнасцей, падбор кваліфікацый, павышэнне эфектыўнасці навучальных планаў. З відаў устаноў агульнай сярэдняй адукацыі выключаны страціўшыя сваю актуальнасць вячэрнія школы.

Таксама плануецца рэалізаваць прынцып абавязковасці агульнай сярэдняй адукацыі (у дзеючым Кодэксе гаворыцца аб абавязковай базавай адукацыі – 9 класаў). Тыя, хто атрымаў агульную базавую адукацыю і не дасягнуў 18 гадоў, маюць права працягваць навучанне ў прафесійных каледжах.

У артыкуле аб размеркаванні выпускнікоў, якія атрымалі прафесію за кошт бюджэту, вызначаны катэгорыі выпускнікоў, якія ў адпаведнасці з атрыманай спецыяльнасцю павінны быць забяспечаны першым месцам працы праз размеркаванне, а таксама тыя, каму яно не прадастаўляецца. Да апошніх адносяцца выпускнікі, якія атрымалі адукацыю па спецыяльнасцях для воінскіх фарміраванняў і ваенізаваных арганізацый. Месца працы ім прадастаўляецца ў парадку, якi прадугледжаны заканадаўствам аб праходжанні адпаведнай службы. Удакладнены таксама пералік грамадзян, для якіх тэрмін абавязковай адпрацоўкі па размеркаванні складае 2 гады, і тых, для каго ён роўны 1 году.

Уводзіцца новы артыкул «Працаўладкаванне ў лік броні», у якой прадугледжана браніраванне месцаў для выпускнікоў з ліку дзяцей­ сірот і дзяцей, якія засталіся без апекі бацькоў, грамадзян з асаблівасцямі псіхафізічнага развіцця, якія атрымалі прафесійна-­тэхнічную, сярэднюю спецыяльную або вышэйшую адукацыю.

Яшчэ адно новаўвядзенне – залічэнне ў тэрмiн абавязковай адпрацоўкі па пераразмеркаванні па жаданні выпускніка, маладога спецыяліста, рабочага наступных перыядаў: ваеннай службы па прызыве, кантракце, службы ў рэзерве, альтэрнатыўнай службы, знаходжання ў адпачынку па доглядзе дзіця да дасягнення ім трох гадоў. Адкарэктаваны артыкул аб вяртанні сродкаў, затрачаных дзяржавай на падрыхтоўку спецыялістаў, рабочых, служачых. Вызначаны выпадкі, калі затраты абавязаны кампенсаваць наймальнік.

З навучэнцаў, хто прапусціў навучальныя заняткі, якія праходзілі ў адпаведнасці з раскладам, за правядзенне паўторных заняткаў па­за вучэбнай групай з выкарыстаннем вучэбна­лабараторнага абсталявання або прыцягненнем тэхнічнага персаналу цяпер можа спаганяцца плата. Памер яе будзе ўстанаўлівацца ўстановай адукацыі, а парадак разліку і ўмовы спагнання – Міністэрствам адукацыі. Норма тычыцца і студэнтаў дзяржаўных ВНУ, і навучэнцаў прафесійна­тэхнічнай і сярэдняй спецыяльнай адукацыі.

Таксама ў Кодэкс прапануецца ўнесці новыя артыкулы: «Атэстацыя экстэрнаў», «Страта статусу маладога спецыяліста,
маладога рабочага (служачага)», «Вучэбна­метадычныя аб’яднанні ў сферы агульнай сярэдняй адукацыі», і шэраг новых палажэнняў, накіраваных на падрыхтоўку кадраў па спецыяльнасцях для воінскіх фарміраванняў і ваенізаваных арганізацый, а таксама навучанне тых, хто ўтрымлiваецца ў следчых ізалятарах і папраўчых установах.

Хочацца адзначыць, што абмеркаванне праекта, а значыць, і збор прапаноў па карэкціроўцы Кодэкса працягваецца. Калі мы зараз не абмяркуем тыя недахопы, якія існавалі ў ранейшым дакуменце, яны «перавандруюць» і ў новую яго рэдакцыю. Свае прапановы можна адправіць на мой асабісты электронны адрас ganchuk@house.gov.by, альбо пакінуць праз электронную форму на сайце Палаты прадстаўнікоў http://house.gov.by – паінфармаваў Андрэй Аляксандравіч.

Вольга НАБОКАВА.
Фота аўтара.

***

Сустрэчу з насельніцтвам аграгарадкоў Цяхцін і В.Машчаніца днямі правяла дэлегат VI Усебеларускага народнага сходу, старшыня райаб’яднання прафсаюзаў, якія ўваходзяць у ФПБ, Святлана ПАТАПЧЫК.

Акрамя абмеркавання ключавых аспектаў народнага форуму, дэлегат пагутарыла з вяскоўцамі аб іх жыццёвых праблемах. Так, жыхары Цяхціна падзяліліся з суразмоўцай хвалюючым пытаннем – неспакоем, які ім дастаўляе бадзячая жывёла. З тае пары, калі адловам яе перастаў займацца жылкамгас, і парадак вырашэння гэтай праблемы стаў больш складаны, патрабаваць значных выдаткаў, безнаглядныя чацвёраногія часцей турбуюць мясцовых жыхароў.

Увогуле, па словах сяльчан, пытанні, якія ўзнікаюць, трымае на кантролі старшыня Цяхцінскага сельсавета Аляксандр Цыбульскі, шмат з іх вырашаецца на месцы.