Важна пры любых умовах захаваць законнасць
У райвыканкаме асабісты прыём грамадзян правёў першы намеснік міністра юстыцыі Беларусі Сяргей ЗАДЗІРАН.
Да яго звярнуліся двое грамадзян па пытанні выканання рашэння суда аб утрыманні грашовых сродкаў з будаўнічай арганізацыі г. Магілёва. Адпаведная выканальніцкая дзейнасць распачата аддзелам прымусовага выканання Ленінскага раёна абласнога цэнтра.
Грамадзяне распавялі, што вырашылі палепшыць свае жыллёвыя ўмовы. Яны звярнуліся ў прыватную кампанію Магілёва, якая прапаноўвала выгадныя ўмовы будаўніцтва, сабралі неабходныя дакументы, аплацілі ўсе неабходныя ўнёскі і пачалі чакаць. Але ў хуткім часе забудоўшчык пачаў мяняць умовы, што заяўнікі палічылі непрымальным. Яны звярнуліся ў суд і выйгралі яго. Справа была перададзена ў аддзел прымусовага выканання Ленінскага раёна горада Магілёва. Пакуль выконваліся ўсе судовыя і адміністрацыйныя працэдуры, грамадзяне пачалі хвалявацца, што кампанія можа «згарнуцца» і сваіх грошай яны не пабачаць. Таму і завіталі на прыём да намесніка міністра юстыцыі з пытаннем, ці не пераўтварылася судовая выканальніцкая вытворчасць у папяровую валакіту.
На прыёме прысутнічалі таксама начальнік аддзела прымусовага выканання Ленінскага раёна г. Магілёва Дзмітрый АГЕЕЎ і першы намеснік начальніка галоўнага ўпраўлення юстыцыі Магаблвыканкама Андрэй СТАЛЯРОЎ.
Дзмітрый Агееў патлумачыў заяўнікам, што іх пытанне знаходзіцца на кантролі ў аддзеле прымусовага выканання і распавёў, якім чынам вядзецца выканаўчая вытворчасць, а таксама дадаў, што справа абавязкова вырашыцца ў інтарэсах грамадзян.
– Такія выпадкі, на жаль, яшчэ бываюць, – сказаў напрыканцы сустрэчы Сяргей Задзіран. – Для вырашэння гэтых пытанняў патрабуецца шмат часу, але ў любой сітуацыі трэба рабіць усё магчымае, каб захаваць патрабаванні заканадаўства.
Святлана МАГІЛЕЎЧЫК.
Фота аўтара.