Інтэрв’ю з працалюбівым абліцоўшчыкам-плітачнікам ПМК-241 Аляксандра Смаковічам
Адказнасць, прынцыповасць, працалюбівасць, – вось асноўныя асабістыя якасці абліцоўшчыка-плітачніка ПМК-241 Аляксандра СІМАКОВІЧА.
Аляксандр у будаўніцтве чалавек не новы, працуе ў ПМК-241 больш за 15 гадоў. Пачынаў свой працоўны шлях тынкоўшчыкам, а праз два гады пачаў шчыраваць абліцоўшчыкам-плітачнікам. Ён прымаў удзел у будаўніцтве шматлікіх аб’ектаў Круглянскага і Шклоўскага раёнаў, а таксама ў Бялынічах. Норма яго выпрацоўкі складае 106%.
Аляксандр Сімаковіч нарадзіўся і вырас у Вялікай Машчаніцы, там жа скончыў агульнаадукацыную школу. Прафесія будаўніка захапляла з малку, таму вырашыў паступаць у Магілёўскае ПТВ-237. Пасля яго заканчэння атрымаў спецыяльнасць «майстар аздабленчых работ». Потым юнака прызвалі на тэрміновую службу, пасля якой ён вярнуўся на малую радзіму і ўладкаваўся ў ПМК-241.
Кіраўніцтва прадпрыемства характарызуе Аляксандра Анатолевіча як працалюбівага і стараннага работніка, які кваліфікавана і своечасова выконвае пастаўленыя перад ім задачы. Няякаснае выкананне працы – гэта не пра яго, таму што яго майстэрству можа пазайздросціць любы прафесіянал. Ён вельмі патрабавальна адносіцца да сваёй справы, назапашаны вопыт імкнецца перадаць менш вопытным калегам.
– Прафесію абліцоўшчыка-плітачніка лічу сапраўднай мужчынскай прафесіяй, – кажа Аляксандр Сімаковіч. – Для мяне яна цікавая, паколькі патрабуе высокай кваліфікацыі. Я люблю назіраць, як прыгажэе памяшканне пасля аздаблення, асабліва, калі гэтую прыгажосць ты ствараў сам. А яшчэ больш падабаецца бачыць, наколькі ўражваюцца вынікамі маёй справы людзі, якія побач.
Аляксандр дабіўся пэўных поспехаў не толькі на прафесіянальнай ніве, але і ў асабістым жыцці, стварыўшы моцную сям’ю. На сёння Аляксандр Сімаковіч разам з жонкай Аленай выхоўваюць дачку Ілону, пабудавалі ўласную кватэру. Калі з’яўляецца вольная хвілінка, мужчына адпраўляецца на рыбалку, часам разам з жонкай.
Дарэчы, падчас злёту перадавікоў народнай гаспадаркі па выніках за мінулы год за шматгадовую добрасумленную працу Аляксандр Сімаковіч узганароджаны граматай Прэзідыума Савета райаб’яднання прафсаюзаў, якія ўваходзяць у ФПБ.
Наталля СІДАРОВІЧ.
Фота аўтара.