На календары – другая палова сакавіка, а на вуліцы надвор’е яшчэ не зусім вясновае: кожны дзень падмарожвае, снег не ўвесь сышоў. Але гэта зусім не перашкаджае правядзенню некаторых відаў сельгасработ, бо цяпер – самы час для іх.
Марознае надвор’е асабліва спрыяе вывазу арганікі на палі. Па інфармацыі аддзела інтэнсіфікацыі вытворчасці сельгаспрадукцыі ўпраўлення па сельскай гаспадарцы і харчаванні райвыканкама, у гаспадарках раёна пад яравыя культуры вывезена больш за 232 тысячы тон арганічных угнаенняў з 265 тысяч тон нарыхтаваных. ­ З унясеннем арганікі ў глебу ў раёне лідзіруюць ААТ «Аграсервіс» і «РАПТЗ» – у іх зроблена ­амаль 70% ад запланаванага. Таксама ў гаспадарках раёна актыўна вя­дзецца падсеў шматгадовых траў. Найбольшую плошчу – больш за тысячу гектараў ‒ трэба падсеяць у ААТ «Новая Друць». Яшчэ адна важная праца – аэрацыя зямель.
– На гэтым відзе работ задзейнічаны вопытны механізатар Анатоль ІГНАТОВІЧ, – распавядае галоўны аграном таварыства Таццяна КАКОРЫНА. – На трактары «Беларус» 35-22 ён барануе палеткі, дзе пасеяны бабова-злакавыя сумесі.
Каля аграгарадка Вялікая Ма­шчаніца ва ўрочышчы «Ключыкі» 93 гектары займаюць клевер і фестулоліум. Летась, дзякуючы строгаму выкананню агратэхнічных прыёмаў, на гэтым полі ўдалося атрымаць тры ўкосы высокабялковай зялёнай масы. У бягучы сельгассезон поспехі плануюць паўтарыць, бо на сёння перад раслінаводамі таварыства стаіць задача стварыць трывалую кармавую базу для жывёлы.
– Таксама мы актыўна ўносім на палі арганіку, – дадае галоўны аграном. – На яе вывазе і ўнясенні з буртоў у глебу працуюць два механізаваныя атрады. Зрабілі неабходныя падкормкі хлорыстым каліем, а пры ўстанаўленні ўстойлівых плюсавых тэмператур бу­дзем уносіць пад азімыя культуры КАС.
– Усе агранамічныя службы гаспадарак раёна распачалі сезон вясенне-палявых работ, – рэзюмуе першы намеснік старшыні райвыканкама-начальнік райсель­гасхарчу Віталь ЛАСЯНКОЎ. – Клопат пра будучы ўраджай пачынаецца яшчэ з восені, калі аграрыі рыхтуюць глебу пад яравыя культуры, сеюць азімыя. Гэтай вясной, дзякуючы ўстойліваму надвор’ю, працаўнікі гаспадарак паспелі зрабіць шмат, што дае спадзяванні на своечасовае правядзенне самага галоўнага комплексу вясенніх сельгасработ – пасяўной кампаніі.


Святлана МАГІЛЕЎЧЫК.
Фота аўтара.

Print Friendly, PDF & Email

Добавить комментарий

Ваш адрес email не будет опубликован. Обязательные поля помечены *