КУПАЛЫ НАД ВІШОВАМ

Дзесяткі вішоўцаў сабраліся ля Петрапаўлаўскай царквы, каб стаць сведкамі гэтага гістарычнага моманту. Абрад асвячэння правёў Епіскап Магілёўскі і Мсціслаўскі Уладыка Сафроній.

Варта згадаць, што будаўніцтва новага храма вядзецца выключна за кошт СВК “Калгас “Радзіма” гаспадарчым спосабам. Сіламі будаўнічай брыгады сельгаспрадпрыемства за год практычна завершаны асноўныя будаўніча-мантажныя работы і зараз яна прыступіла да добраўпарадкавання прылеглай тэрыторыі. Па словах прараба будоўлі Аляксандра Троцкага, узвядзенне царквы стала для будаўнікоў гаспадаркі справай новай, але вельмі цікавай. Амаль з першых дзён на гэтым аб`екце шчыравалі цесляры Дзмітрый Грыцаеў, Валянцін Чэпікаў, Ігар Сапуноў, якія стараліся якасна і аператыўна выканаць даведзены аб`ём работ.

Дарэчы, як адзначыў старшыня сельгаскааператыва Аляксандр Лапацентаў, ужо да 1 кастрычніка будаўніцтва храма будзе поўнасцю завершана.

— Магілёўская епархія паабяцала нам дапамогу ў вырабе іконастаса і званоў, — гаворыць Аляксандр Міхайлавіч. – Зараз актыўна ідзе пошук будучага настаяцеля нашай Петрапаўлаўскай царквы. Дарэчы, гаспадарка прадастаўляе яму новы добраўпарадкаваны дом побач з царквой і часткова бярэ на сябе выдаткі на яго ўтрыманне. Увогуле, з адкрыццём праваслаўнага храма мы звязваем вялікія надзеі на духоўнае адраджэнне вёскі.

Андрэй КУНЦЭВІЧ.

(Нумар ад 29.08.07)