ЦЯХЦІНСКІ КРУХМАЛЬНЫ ЗАВОД: ЧАРГОВЫ ЭТАП БУДАЎНІЦТВА

Асноўная рабочая нагрузка зараз прыпадае на спецыялістаў аднаго з Мінскіх будаўніча-мантажных упраўленняў, якія збіраюць каркас вытворчага цэха будучага модуля. Як адзначае дырэктар ААТ “Новая Друць” Ігар Бондараў, на працу сталічных мантажнікаў у яго асабіста няма абсалютна аніякіх нараканняў, паколькі яны з’яўляюцца сапраўднымі майстрамі сваёй справы. Іхнімі рукамі сабрана некалькі складаных модуляў, у тым ліку, напрыклад, і адзін з сучасных крытых рынкаў у Мінску.

Работы па зборцы каркасу модуля асноўнага вытворчага цэха ў аграгарадку Цяхцін, заўважае Ігар Іванавіч, вядуцца ў поўнай адпаведнасці з графікам, таксама ў дамоўленыя тэрміны на будаўнічую пляцоўку дастаўляюцца і ўсе неабходныя будматэрыялы і патрэбнае абсталяванне.

Да слова сказаць, на будаўніцтве гэтага крухмальнага завода ў якасці аднаго з субпадрадчыкаў задзейнічаны і рабочыя ПМК-83 “Магілёўводбуда”.

Нагадаем, што тэндэрную прапанову па ўзвядзенні ў ААТ “Новая Друць” сучаснага крухмальнага завода напрыканцы мінулага года выйграла Пекінская праектна-вытворчая карпарацыя “Cletc”, якая за свой модуль і тэхналагічнае абсталяванне па вытворчасці крухмалу да яго запрасіла куды больш сціплую суму, чым канкурэнты з Польшчы, Германіі, Галандыі і іншых краін, што ўдзельнічалі ў тэндэрным саперніцтве.
Неабходна падкрэсліць і тое, што незалежныя эксперты адзінадушна прыйшлі да наступнай высновы: пекінскі праект ні ў чым не саступае заходнееўрапейскім аналагам.
Прадукцыйнасць будучага крухмальнага завода ў Цяхціне складзе перапрацоўку 100 тон бульбы за суткі пры трохзменнай яго рабоце.

З пускам модуля ў вытворчасць новыя рабочыя месцы могуць атрымаць каля 40 чалавек.
Такім чынам, з дзейнасцю гэтага завода звязваюць перспектывы свайго жыцця многія жыхары аграгарадкоў Цяхцін, Вялікая Машчаніца, бліжэйшых да іх вёсак, а таксама і бялынічане.

Міхась ЗАВЕЙНЫ.

(Нумар ад 12.09.07)