У Бялынічах адбыўся ХІ абласны конкурс выканаўцаў маладзёжнай і патрыятычнай песні, прысвечаны памяці Героя Савецкага Саюза Леаніда Лорчанкі.

Традыцыя правядзення гэтага маладзёжнага фэсту зарадзілася яшчэ ў васьмідзесятыя гады мінулага стагоддзя, аднак, у 2004-ым часова прыпынілася. І вось зноў на галоўнай сцэне Прыдруцкага краю сабраліся лепшыя выканаўцы Магілёўшчыны, у тым ліку і мясцовыя артысты: народны вакальны ансамбль “Бялыніца”, салісткі народнай эстраднай студыі “Колеры” Людміла Трусава і Вішоўскага Цэнтра творчасці і вольнага часу Алена Кандрашонак.

Перад пачаткам конкурсу ўдзельнікі яго ўсклалі кветкі да бюста Лёні Лорчанкі, што ўстаноўлены на Алеі Герояў, і на яго магілу, якая знаходзіцца на могілках у вёсцы Антонава Буда. Там жа прайшоў мітынг.

Праграма конкурсу патрыятычнай песні складалася з двух этапаў. У першы дзень выканаўцы, а іх у Бялынічы завітала каля 90 чалавек, праходзілі праслухоўванне. Песні яны спявалі выключна  патрыятычныя, у большасці – на беларускай мове. “Беларусь мая”, “Бялявая, чарнявая”, “Рэчанька”, “Дзве сястры” і многія іншыя не пакінулі раўнадушнымі ні гледачоў, ні журы. У выніку, апошнія на чале з кампазітарам, мастацкім кіраўніком народнага духавога аркестра УА “Магілёўскі дзяржаўны музычны каледж імя Рымскага-Корсакава” Генадзем Багамолавым абралі 16 выканаўцаў і мастацкіх калектываў, якія ў далейшым і падзялілі паміж сабой прызавыя месцы ў намінацыях: “Салісты-выканаўцы”, “Аўтары-выканаўцы”, “Вакальныя ансамблі”, «Калектывы малых форм». Пераможцамі конкурсу сталі: спявачка Вольга Максімава, дуэт Дзяніса Леаненка і Аляксандра Селіванава, ансамбль “Бялыніца” раённага Цэнтра культуры. Яны ўзнагароджаны Дыпломамі і каштоўнымі падарункамі райвыканкама.

Дыплом ІІІ ступені атрымала і яшчэ адна прадстаўніца Бялыніччыны – Алена Кандрашонак.

Гран-пры конкурсу заваявала спявачка з Бабруйска Маргарыта Халатава. Таленавітая выканаўца ўжо неаднаразова станавілася пераможцай шматлікіх конкурсаў. У прыватнасці, “Белазаўскі акорд-2006”, “Маладзечна-2009”, “Крымскі голуб-2010”, фіналісткай рэспубліканскага праекта “Галасы Беларусі”.

— Мне часта прыходзіцца прымаць удзел у розных музычных конкурсах, — дзеліцца ўражаннямі Маргарыта. – З вышыні свайго вопыту магу сказаць, што гэты конкурс прайшоў на даволі высокім арганізацыйным узроўні. Дастойна выступалі і выканаўцы. Сваёй перамогай я, канечне ж, вельмі задаволена: прыемна адчуваць сябе лепшай.

Са станоўчага боку выказаўся аб конкурсе і Генадзь Багамолаў. Выклікаў нараканне ў кампазітара толькі той факт, што маладыя спевакі, як кажуць, ідуць па пратаптанай сцежцы.

— У апошнія гады беларускімі аўтарамі напісаны вельмі многа добрых, шчырых і патрыятычных песень, – адзначыў Генадзь Іванавіч. – Аднак, выканаўцы чамусьці не спяшаюцца ўключаць іх у свой рэпертуар, аддаюць перавагу класіцы. Спадзяюся, што сітуацыя зменіцца. І на наступны раз мы пачуем з бялыніцкай сцэны новыя творы. 

Іна КАРАЛЁНАК.