ВЫНІКІ ПАДВЕДЗЕНЫ. ЗАДАЧЫ ПАСТАЎЛЕНЫ

Днямі ў малой зале раённага Цэнтра культуры адбыўся 13-ы Пленум раённай арганізацыі грамадскага аб’яднання “Беларускі рэспубліканскі саюз моладзі”.

Галоўным пытаннем, якое выносілася на павестку дня, з’яўлялася падвядзенне вынікаў рэспубліканскай маладзёжнай працоўнай акцыі “Маладосць. Традыцыі. Будучае”, якая праходзіла з красавіка па май бягучага года.

Як адзначыла в.а. першага сакратара райкама БРСМ Алена Кандрашонак, усе заробленыя падчас акцыі грошы пералічаны на добраўпарадкаванне тэрыторыі абапал Камсамольскага возера ў Мінску.

Акрамя гэтага, былі акрэслены мэты і задачы абласной акцыі  БРСМ “Доўг. Чэсць. Радзіма”, якая будзе праводзіцца на Магілёўшчыне з ліпеня па верасень бягучага года і прымеркавана да пяцігоддзя стварэння Беларускага рэспубліканскага саюза моладзі.

У рабоце Пленума актыўны ўдзел прыняла другі сакратар абласнога камітэта ГА “БРСМ” Алена Дзівакова.

“ЗРОБІМ РАДЗІМУ ПРЫГОЖАЙ!”

Пад такім дэвізам з 1 ліпеня па 16 жніўня бягучага года на Бялыніччыне праходзіць раённы этап рэспубліканскага конкурсу грамадскага аб’яднання “Беларускі рэспубліканскі саюз моладзі” “Моладзь за чысціню гарадоў і вёсак”.

Яго задачамі з’яўляецца прапаганда беражлівых адносін да прыроды, патрыятычнае, экалагічнае і духоўнае выхаванне маладога пакалення.

— У ходзе конкурсу сярод актыўных членаў маладзёжнай арганізацыі Прыдруцкага краю будуць сфарміраваны валанцёрскія атрады па добраўпарадкаванню прыродаахоўваемых аб’ектаў, — расказвае в.а. другога сакратара райкама БРСМ Ирына Бяляўцава. – Хлопцы і дзяўчаты будуць задзейнічаны на ўборцы тэрыторый каля помнікаў воінскай славы, паркаў адпачынку, аб’ектаў культурна-гістарычнай і духоўнай спадчыны.

Па выніках праведзенай работы аргкамітэт, у склад якога ўвойдуць прадстаўнікі райкама БРСМ і райінспекцыі прыродных рэсурсаў і аховы навакольнага асяроддзя, вызначыць лепшае працоўнае аб’яднанне моладзі.