1634, 4 кастрычніка. Бялынічы атрымліваюць ад караля польскага і вялікага князя Вялікага Княства Літоўскага Уладзіслава Вазы прывілей на самакіраванне па тыпу магдэбургскага права, пячатку і герб мястэчка.

1635, восень. Па версіі каноніка Люцыяна Гадлеўскага абраз Маці Боскай Бялыніцкай цудатворным чынам з’яўляецца ў Бялыніцкім кармеліцкім касцёле.

1654, 8 кастрычніка. Каля Бялынічаў разгромлены атрад казакаў Бушакова, які змагаўся на баку маскоўскай дзяржавы.

1761, 20 кастрычніка. Ускладанне біскупам Гільзеным карон на цудадзейны абраз Маці Боскай Бялыніцкай, якое праходзіла ў Бялынічах.

1847, 27 кастрычніка. У высылцы ў горадзе Сарапул Вяцкай губерні памірае Казімір Чарноўскі.

1899, 11 кастрычніка. Адзін з найбольш багатых мясцовых землеўладальнікаў С. Мясаедаў у сваім завяшчанні адпісвае ўчастак зямлі памерам у дзесяціну для пабудовы бальніцы.

1904, 10 кастрычніка. Пагром яўрэяў у Галоўчыне – гэтак званы “мабілізацыйны” пагром, які быў выкліканы мабілізацыяй на руска-японскую вайну і звязаны з яўрэйскімі пагромамі ў Магілёве.

1918, 31 кастрычніка. Апошні дзень акупацыі Магілёўшчыны войскамі Доўбар-Мусніцкага і кайзераўцамі.

1924, 14 кастрычніка. Першая раённая сельскагаспадарчая выстава. Экспанаты размяшчаліся ў 9 павільёнах, дзе дэманстравалі свае дасягненні 114 сялянскіх гаспадарак, кааператыўная арганізацыя і 6 сельгасаб’яднанняў.