Да завяршэння работ у Ліпавым Гаі засталася апошняя рыса: устаноўка крытай пляцоўкі для выступлення артыстаў падчас святочных мерапрыемстваў. Аднак ужо сёння наведвальнікі парка могуць атрымліваць асалоду ад прыемнага баўлення тут вольнага часу.

Абноўленыя Алея Герояў, пешаходныя зоны, веладарожкі, лавачкі, дзіцячая пляцоўка не могуць не радаваць сваёй утульнасцю, зручнасцю і прыгажосцю. Аб чым, уласна кажучы, сведчаць і меркаванні бялынічан, якіх карэспандэнт “Зары над Друццю” сустрэла падчас прагулкі па парку.

Наталля ШАРХУНОВА шмат гадоў запар ідзе на працу і вяртаецца дамоў менавіта праз Ліпавы Гай.

– Канечне, парк стаў утульным, дагледжаным і выглядае нават памаладзеўшым, – кажа Наталля Піліпаўна. – Нельга не адзначыць зручнасць новых тратуарных зон, бо раней на вузкай сцежцы цяжка было размінуцца і пешаходам, і маці з дзіцячымі вазкамі, і веласіпедыстам. Увогуле, тыя змены, дзякуючы якім Ліпавы Гай не толькі набыў прыемнае для позірку аблічча, але і стаў значна больш рацыянальным для перамяшчэння, прыйшліся па душы.

Добрыя перамены ацаніла і жыхарка райцэнтра Святлана НОВІКАВА, для якой Ліпавы Гай ужо больш за 10 гадоў з’яўляецца месцам не толькі прыемнага, але і карыснага для здароўя адпачынку.

– Тут прайшло ўсё маё дзяцінства, – распавяла Святлана Іванаўна. – З сажалкі раней набіралі ваду для мыцця адзення. А навакольная дзетвара тут бавіла вольны час. Прайшоў не адзін дзясятак гадоў, а Ліпавы Гай, як і раней, застаецца ў маім жыцці. На 70-годдзе суседка падарыла мне прылады для скандынаўскай хадзьбы. З тае пары кожны дзень, нягледзячы на надвор’е, разам з сяброўкай прагульваемся па дарожках парка і стадыёна. Цяпер, калі паверхня тратуараў стала роўнай, і самі яны пашырыліся, хадзіць, канечне, стала больш камфортна. З раённай газеты “Зара над Друццю” даведалася, што значна больш функцыянальным стане і абноўлены гарадскі стадыён. З нецярпеннем чакаем яго адкрыцця!

– Напэўна, сярод тых, хто пабываў у парку пасля рэканструкцыі, не знойдзецца ніводнага, хто не адзначыў бы сапраўды станоўчыя змены, якія тут адбыліся, пачынаючы ад Алеі Герояў – нашай гісторыі і мінулага, заканчваючы дзіцячай пляцоўкай, – кажа маладая маці Юлія КРАЎЦОВА. – Усёй сям’ёй пастаянна прыходзім сюды. Старэйшы сын Косця і малодшая дачушка Лізавета ўжо ацанілі спартыўныя прылады і арэлі на новай пляцоўцы.

Сямікласнік СШ № 2 Дзмітрый ГАЛАМЫДЗЬКА паркам вельмі задаволены, бо цяпер удосталь можна пакатацца па веласіпедных дарожках на сваім двухколавым транспарце:

– Усё падабаецца! І мосцік праз сажалку, і дарожкі, і новыя лаўкі! Кожны дзень сустракаюся тут з сябрамі!

А вось вучаніца             6 класа СШ № 2 Валерыя БІРУКОВА разам з сяброўкай з Магілёва Марыяй ЧАЙКО ўдасканальваюць свае навыкі ў катанні на скейтах.

– Раней мы каталіся па вуліцах, але гэта было нязручна і небяспечна, – кажуць дзяўчаты. – Вельмі цудоўна, што ў нас ёсць любімае месца – Ліпавы Гай! Як толькі з’яўляецца вольная хвілінка, адразу імчымся сюды пакатацца з ветрыкам!

         Вольга   НАБОКАВА.

            Фота аўтара.