Механізатар СВК “Калгас “Радзіма” Юрый ЗАЙЦАЎ сціпла і коратка расказвае пра сябе і сваю працу.

Яму прасцей сесці ў кабіну трактара і бездакорна выканаць пастаўленую задачу. Што ён і робіць на працягу больш за 10 гадоў, за што і карыстаецца павагай калег і кіраўніцтва гаспадаркі. Больш за ўсё Юрыю падабаецца працаваць на зямлі.

Кожнае лета, 10-ты сезон запар, ён перасядае на камбайн, каб прыняць самы актыўны ўдзел у адным з галоўных перыядаў земляробчага сезона –  жніве. Сёлета  разам с напарнікам Уладзімірам ВАСІЛЬЕВЫМ яны занялі ІІ месца ў раённым спаборніцтве сярод экіпажаў камбайнаў.

На пытанне, якім павінен быць сапраўдны механізатар, Юрый Зайцаў адказвае.

– Церпялівым і, асабліва, працавітым.

У яго павінна быць любоў да зямлі, на якой працуе. Ён абавязаны сачыць за тэхнікай і ўхіляць непаладкі, каб яна не падводзіла.

У гэтыя дні Юрый заняты на ўздыме зябліва. Штодзённа на свой працоўны рахунак ён запісвае больш як па 25 га ворыва, што ў 2,5 раза больш за норму.

– Быць механізатарам, – расказвае Юрый, – і цяжка, і адказна, і цікава. Прафесія патрабуе дасканалых ведаў і ў механіцы, і ў агранаміі, але самае галоўнае – ёй трэба гарэць. Цяжкасці, звязаныя з хлебаробскай працай, забываюцца, калі бачыш вынік сваіх намаганняў.

                                            Аліна ЦЫГАНІЙ.

                                            Фота аўтара.