Птушачку… шкада… Напачатку мінулага тыдня пенсіянерка, якая пражывае па вуліцы Кірава райцэнтра, паскардзілася праваахоўнікам на тое, што суседаў сабака задушыў яе курыцу. За парушэнне правіл утрымання хатняй жывёлы гаспадыні чацвераногага давядзецца заплаціць штраф ад 10 да 30 базавых велічынь.

П’яная варта. У ноч на 19 лютага вартаўнік ААТ “Бялынічы” знаходзіўся на мехдвары гаспадаркі ў стане алкагольнага ап’янення. Ненадзейнага працаўніка выявілі праваахоўнікі падчас начной праверкі.

10 хвілін. Менавіта такі час спатрэбіўся злодзею, каб скрасці ў бялынічанкі кашалёк у магазіне РУП “Белпошта”. Наўмыснік разжыўся на 200 рублёў, якія знаходзіліся разам з банкаўскімі карткамі ўладальніцы. Жанчына хутка ўспомніла аб прапажы і заявіла ў міліцыю. Узбуджана крымінальная справа.

Рукі паадбіваць бы нягоднікам, якія выламілі 5 пралётаў жалезабетоннай агароджы і пашкодзілі драўляныя веснічкі на тэрыторыі домаўладання бялынічаніна па вуліцы Калініна райцэнтра. Гаспадар паскардзіўся ў міліцыю. Вандалаў шукаюць.

Каралём бензакалонкі, магчыма, хацеў адчуць сябе бялынічанiн, калі ў стане алкагольнага ап’янення завітаў на АЗС № 10, што па вуліцы Будаўнікоў. Дапаўняючы свае нахабныя паводзіны адборнай лаянкай, ён перашкаджаў працы работнікаў аўтазапраўкі. Тыя скарысталіся кнопкай трывожнай сігналізацыі. На хулігана складзены адміністрацыйны пратакол.

На гэты раз крымінальная справа за хуліганства ўзбуджана ў адносінах да раней судзімага 56-гадовага бялынічаніна, які, знаходзячыся на аўтастанцыі, без прычыны збіў                    16-гадовага жыхара райцэнтра. У РАУС аб інцыдэнце паведаміла маці юнака.

Вольга НАБОКАВА.