Гэта адна з найбольш важных дат, якія адзначаюцца ААН. 9 кастрычніка 1874 года прадстаўнікамі некалькіх дзясяткаў краін быў падпісаны Бернскі дагавор, у ім быў зацверджаны Генеральны паштовы саюз, а дзень яго падпісання зараз адзначаецца як Сусветны дзень пошты. І нават цяпер, калі адправіць паведамленне можна адным клікам камп’ютарнай мышкі, атрымаць сапраўдны ліст – знак асаблівай увагі.

РУП “Белпошта” выконвае сваю галоўную місію – прадастаўленне паслуг паштовай сувязі для насельніцтва, органаў дзяржаўнага кіравання, прадпрыемстваў і арганізацый, кіруючыся дэвізам: “Хуткасць. Надзейнасць. Даступнасць”. За гэтымі трыма словамі – строгае захаванне стандартаў па прыёме, апрацоўцы, перасылцы і дастаўцы ўсіх відаў паштовых адпраўленняў, укараненне і выкарыстанне новых тэхналогій. А яшчэ – штодзённая напружаная праца ўсяго калектыву прадпрыемства.

Для таго, каб пісьмы даляцелі па адрасе, у нашым раёне працуюць 1 гарадское і 10 сельскіх паштовых аддзяленняў, служба матарызаванай дастаўкі пошты.

Начальнік Бялыніцкага ўчастка паштовай сувязі Марына РУДЗЬКОВА ведае сваю справу ад пачатку і да канца. У гэтай галіне яна робіць ужо 23 гады. Папярэдне Марына Уладзіміраўна працавала на розных пасадах у аддзяленнях паштовай сувязі г. Магілёва. З 1 снежня 2014 года яна ўзначальвае раённы ўчастак паштовай сувязі.

– Эфектыўная работа нашага ўчастка – гэта ў першую чаргу добрая праца яго супрацоўнікаў, – распавядае Марына Рудзькова. – Мы робім стаўку на строгую арганізацыю працоўнага працэсу. Вельмі важная своечасовая апрацоўка адпраўленняў – гэтаму аператары надаюць асаблівую ўвагу. Нашы супрацоўнікі дакладна ведаюць стандарты сэрвісу і абслугоўваюць наведвальнікаў хутка і ветліва.

Раённы ўчастак паштовай сувязі прапануе сваім кліентам самыя разнастайныя паслугі. Гэта прыём,          апрацоўка, перавозка, дастаўка і ўручэнне паштовых адпраўленняў на тэрыторыі Беларусі і ў іншыя краіны (паштовыя карткі, лісты, бандэролі, пасылкі, унутраная і міжнародная паскораная пошта), прыём, перасылка і дастаўка заказных і каштоўных лістоў, банкаўскія паслугі, паслугі электроннай сувязі (электронная пошта, прыём плацяжоў і тэлеграм, паслугі факсімільнай сувязі, электронны гандаль). Займаюцца паштальёны таксама дастаўкай і выплатай пенсій і дапамог.

На пошце ў Бялынічах, а таксама ў аддзяленнях сельскіх населеных пунктаў працуюць 57 супрацоўнікаў. Па словах начальніка арганізацыі, гэта зладжаны калектыў вопытных і адказных работнікаў.

– Паступова нашы шэрагі папаўняюцца маладымі і крэатыўнымі кадрамі. Мы цэнім кожнага работніка, паколькі, нягледзячы на павелічэнне тэхналагічнасці працэсу абслугоўвання нашых кліентаў, галоўным быў і застаецца чалавечы фактар, – гаворыць начальнік Бялыніцкага ўчастка паштовай сувязі.

Калектыў рэдакцыі газеты віншуе ўсіх работнікаў пошты з прафесійным святам і жадае моцнага здароўя, сямейнага шчасця, дабрабыту, узаемаразумення, цярпення і поспехаў у іх нялёгкай працы.

                    Дзмітрый ЦІХАНАЎ.

            Фота аўтара.