З вецярком… Бялынічанка патэлефанавала ў РАУС і паскардзілася на невядомага, які разбіў задняе шкло ў яе аўтамабілі, прыпаркаваным каля дома. Праверку праводзіць РАСК.

Крадуць і крадуць. З пачатку мая ў РАУС паступіла некалькі заяў аб крадзяжах маёмасці. З гаража жыхара Бялыніч даўгарукія вынеслі бензагенератар, кампрэсар і розныя інструменты. У другога бялынічаніна невядомыя скралі вулей, а з магазіна ў аг. Галоўчын пакупнік спрабаваў цішком вынесці лімон.

Не трэба лаяцца! Пакупніцы магазіна “Прыдарожны” ў чымсьці не спадабалася гандлёвае абслугоўванне і яна распачала з прадаўцом скандал. Праваахоўнікі супакоілі жанчыну адміністрацыйным пратаколам.

Прыйшоў і павініўся. Жыхар Эсьмонаў прыйшоў у РАУС і павініўся ў двух крадзяжах, якія зрабіў на лецішчах у вёсцы Вушлава. З адной дачы ён скраў слясарны інструмент і два награвальнікі вады, а з другой – шампунь і нож. Праверку праводзіць АКВ.

Збіў сына. 10 мая ў ЦРБ на прыём да ўрача-хірурга звярнуўся малады чалавек са слядамі пабояў і пераломам прадплечча. Праваахоўнікам патлумачыў, што яго пабіў бацька. Праводзіцца праверка.

Падманула. Жанчына патэлефанавала ў РАУС і паскардзілася на знаёмую, якая аформіла крэдыт на яе прозвішча праз інтэрнэт-сэрвіс без яе згоды. Праверку праводзіць АКВ.

Вінаваты… каровы! Жыхар Цяхціна паскардзіўся праваахоўнікам на тое, што каровы, якія належаць  ААТ “Новая Друць”, пашкодзілі люстэркі ў яго аўтамабілі.

П’яныя на працы. Два факты знаходжання нецвярозых вартаўнікоў на рабочых месцах былі выяўлены праваахоўнікамі. Адзін з парушальнікаў пільнаваў жывёлу на МТК у Свяцілавічах ААТ “Бялыніцкае райаграпрамтэхзабеспячэнне”, другі – на МТК “Ключыкі” ААТ “Новая Друць”.

Ганна КАВАЛЁВА.