У сувязі з эпідэміялагічнай сітуацыяй Беларускі дзяржаўны універсітэт інфарматыкі і радыёэлектронікі ў гэтым годзе спрасціць абітурыентам падачу дакументаў і звядзе чарзе да мінімуму.

“У асабістым кабінеце можна будзе ўвесці ўсю неабходную інфармацыю для фарміравання электроннай асабістай справы абітурыента (ацэнкі дакумента аб сярэдняй адукацыі, вынікі ЦТ, ільготы) і запісацца на канкрэтны час падачы дакументаў”, – удакладнілі ва ўніверсітэце.

БДУІР таксама адновіць падрыхтоўку па трох запатрабаваных спецыяльнасцях:”Квантавыя інфармацыйныя сістэмы”,” Інфакамунікацыйныя тэхналогіі “і”Радыёэлектронныя сістэмы”. Набор пройдзе на бюджэтную і платную формы навучання.

“Аднаўленне набору абумоўлена запатрабаванасцю на рынку працы спецыялістаў, якія валодаюць ведамі ў галінах электроннай тэхнікі, сеткавай бяспекі і лічбавай апрацоўкі. Выпускнікі абноўленых спецыяльнасцяў змогуць рэалізаваць сябе ў IT-сферы, стаць праграмістамі, распрацоўшчыкамі”, – распавёў адказны сакратар прыёмнай камісіі БДУІР Барыс НІКУЛЬШЫН.

На спецыяльнасці “Радыёэлектронныя сістэмы” маладыя людзі атрымаюць кваліфікацыю ў галіне інтэлектуальных радыёэлектронных сістэм, а таксама сістэм радыёлакацыі і радыёнавігацыі. Студэнты спецыяльнасці “Квантавыя інфармацыйныя сістэмы” будуць вывучаць у тым ліку нанатэхналогіі, якія зараз запатрабаваныя ва ўсім свеце. На спецыяльнасці “Інфакамунікацыйныя тэхналогіі” навучаць вырашаць задачы стварэння, перадачы, апрацоўкі, захоўвання і абароны інфармацыі. На ўсіх трох спецыяльнасцях рабяты асвояць мовы праграмавання, web-тэхналогіі, аперацыйныя сістэмы. Акрамя гэтага, змогуць дадаткова вучыцца на IT-курсах, якія адкрыты на базе сумесных лабараторый і цэнтраў, іх у БДУІР больш за 50. 

Сёлета прыём будзе ажыццяўляцца па 34 спецыяльнасцях.

“Ёсць вельмі важны момант, на які абітурыенты часта не звяртаюць увагі. Чым больш паказваеш спецыяльнасцяў у сваёй заяве, тым больш шанцаў паступіць у БДУІР. Абітурыент пры падачы дакументаў можа падаць адразу дзве заявы – і на бюджэт, і на платнае аддзяленне. Пры гэтым пералік спецыяльнасцяў, іх колькасць і прыярытэт можа быць розным для дзвюх заяў. У выпадку непаступлення на бюджэт заява будзе ўлічаная ў конкурсе на платную форму навучання, што не запатрабуе дадатковага візіту ў прыёмную камісію”, – распавядае начальнік аддзела суправаджэння прыёмнай камісіі БДУІР Паліна САКАЛОЎСКАЯ.

Акрамя таго, для абітурыентаў у цяперашнюю прыёмную кампанію будзе арганізаваны конкурс у сацыяльнай сетцы TikTok. З 30 чэрвеня па 14 ліпеня маладым людзям трэба будзе зняць відэа на тэму “Рабі, як…”. Пераможцы атрымаюць з рук рэктара байку з лагатыпам ВНУ.

БДУІР застаецца адным з самых запатрабаваных ВНУ краіны. Шэраг спецыяльнасцяў карыстаецца асаблівым попытам у абітурыентаў. Па выніках прыёмнай кампаніі 2020 года самымі папулярнымі на дзённай форме атрымання адукацыі за кошт сродкаў бюджэту сталі спецыяльнасці “Электронны маркетынг” (прахадны бал – 366), “Інфармацыйныя сістэмы і тэхналогіі (у гульнявой індустрыі)” – 365, “Эканоміка электроннага бізнесу” – 363, “Праграмнае забеспячэнне інфармацыйных тэхналогій” – 358.

Падрыхтавана па матэрыялах сайта БелТА.