Намеснік старшыні Савета Рэспублікі Нацыянальнага Сходу Рэспублікі Беларусь Марыянна ШЧОТКІНА наведала з рабочым візітам СВК “Калгас “Радзіма”

У рамках Адзінага дня інфармавання намеснік старшыні Савета Рэспублікі Нацыянальнага Сходу Рэспублікі Беларусь Марыянна ШЧОТКІНА наведала з рабочым візітам СВК “Калгас “Радзіма”.

Гэта гаспадарка была выбрана для паездкі невыпадкова. Менавіта яна з’яўляецца пляцоўкай для пераймання працоўнага і жыццёвага вопыту. Тут штогод дабіваюцца высокіх паказчыкаў у эканамічнай дзейнасці, на высокім узроўні развіты сацыяльная сфера, культура вытворчасці, адбываецца моцнае ўзаемадзеянне паміж усімі сферамі жыцця і дзейнасці вяскоўцаў праз далучэнне да гістарычнай спадчыны і традыцый, прывіцця любві і павагі да малой радзімы, да сваіх каранёў.

У суправаджэнні старшыні СВК “Калгас “Радзіма”, Заслужанага працаўніка сельскай гаспадаркі Аляксандра ЛАПАЦЕНТАВА Марыянна Шчоткіна наведала сацыяльныя аб’екты гаспадаркі: Алею Славы, музей сельгаскааператыва, дзе пазнаёмілася з гісторыяй калгаса, захаваннем працоўных дасягненняў і традыцый, якія сёння перадаюцца падрастаючаму пакаленню.

Падчас сустрэчы з прадстаўнікамі працоўнага калектыву гаспадаркі намеснік старшыні Савета Рэспублікі гутарыла на самыя разнастайныя тэмы. У першую чаргу яна падзялілася ўражаннямі ад “Вялікай размовы з Прэзідэнтам”, у якой прымала ўдзел. Марыянна Шчоткіна паведаміла, што хоць наша краіна і невялікая, аднак перад ёй паўстаюць сур’ёзныя пытанні ў плане бяспекі, у тым ліку і інфармацыйнай. Таксама яна акцэнтавала ўвагу на аспектах дзейнасці Саюзнай дзяржавы, функцыянавання заканадаўчай улады і сацыяльнай накіраванасці бюджэту краіны.

Падчас сустрэчы ўзнімаўся шэраг пытанняў, якія тычыліся дэмаграфічнай сітуацыі ў краіне, сацыяльнай абароны мнагадзетных сем’яў, пенсійнага забеспячэння…

– Для таго, каб жыць камфортна і ўтульна, трэба ствараць неабходныя ўмовы, – падкрэсліла Марыянна Акіндзінаўна. – А для гэтага кожны павінен працаваць на сваім месцы. Падчас сённяшняй сустрэчы са старшынёй сельгаскааператыва ўпэўнілася, што ў гэтай гаспадарцы ёсць сапраўдны гаспадар, чалавек, які нераўнадушны да праблем сваіх аднавяскоўцаў, кіраўнік з перспектыўнымі поглядамі. У вас дакладна адладжана сістэма ўзаемадзеяння ўсіх сфер жыццядзейнасці, падрастаючае пакаленне акружана клопатам з боку і школы, і бацькоў.

Наколькі прыемна бацькам бачыць, што на іх вытворчых аб’ектах вывешаны спісы з поспехамі і дасягненнямі іх дзяцей у школе. У той жа час і калі дзеці адчуваюць гонар за сваіх бацькоў у тым, што яны – перадавікі вытворчасці. Важна і матэрыяльная падтрымка – стыпендыі лепшым вучням школы, якія аплачвае гаспадарка. У сельгаскааператыве замацоўваюцца маладыя спецыялісты, захоўваюцца традыцыі і гісторыя. Гэта з’яўляецца моцным стымулам для людзей, – прыходзіць упэўненасць у заўтрашнім дні. Гэтым трэба не толькі ганарыцца, але і цаніць у наш няпросты час.

Завяршылася сустрэча невялікім канцэртам-прэзентацыяй творчасці народнага ансамбля народнай песні “Вабічанскія ўзоры”, які дзейнічае пры Вішоўскім СЦК і ВЧ.

Святлана МАГІЛЕЎЧЫК. 

Фота аўтара.