Вялікай размовы працяг

Нагадаем, што “Вялікая размова з Прэзідэнтам” прайшла ў першы месяц каляндарнай вясны ў фармаце адкрытага дыялогу кіраўніка дзяржавы Аляксандра Лукашэнкі з прадстаўнікамі грамадскасці, экспертнай супольнасці, беларускіх і замежных СМІ.

Напярэдадні яе інфармагенцтва БелТА правяло акцыю “Ваша пытанне Прэзідэнту”, падчас якой паступіла амаль 2 тысячы пытанняў і прапаноў. Сваімі надзённымі праблемамі з кіраўніком дзяржавы падзяліліся і двое жыхароў нашага раёна, аб чым рэдакцыя праінфармавала чытачоў газеты ў папярэднім нумары “Зары над Друццю”, адзначыўшы, што гэтыя звароты знаходзяцца ў працэсе разгляду.

І вось чарговая нагода прадоўжыць гэту тэму. Паводле інфармацыі ўпраўлення па працы са зваротамі грамадзян і юрыдычных асоб Магаблвыканкама, пытанне аб непрадаўжэнні кантракта з гаспадаром шматдзетнай сям’і з г. Бялынічы вырашылася тым, што наймальнік паведаміў гэтаму работніку аб прадаўжэнні з ім працоўных адносін на тэрмін да 3 красавіка 2022 года. Ад работніка таксама паступіла наймальніку ініцыятыўная заява аб прадаўжэнні кантракта на вышэй названы тэрмін.

Што ж да зварота адносна афармлення права на зямельны ўчастак у вёсцы Заазер’е, то гэта пытанне знаходзіцца ў стадыі вырашэння. У прыватнасці, праваахоўныя органы праводзяць праверку інфармацыі заяўніцы аб факце падробкі дакументаў па адводзе зямельнага ўчастка пасадавымі асобамі аднаго з праектных інстытутаў.

Адзначым таксама, што жанчыне неаднаразова даваліся вычарпальныя адказы, тлумачыўся парадак афармлення правазасведчвальных дакументаў на зямельны ўчастак. У тым ліку і на спрэчныя дадатковыя 0,05 гектара.

Міхась КАРПЕЧАНКА.      

Print Friendly, PDF & Email