Дабрабыт кожнага дома і кожнай сям’і ў многім залежыць ад зладжанай і сістэмнай дзейнасці працаўнікоў жыллёва-камунальнай сферы. Вода- і цеплазабеспячэнне, водаадвядзенне, капітальны рамонт шматкватэрных дамоў, збор, вываз і ўтылізацыя адходаў, падтрыманне парадку ў населеных пунктах, азеляненне вуліц, мантаж і абслугоўванне прыбораў уліку цяпла і вады – вось спектр асноўных сфер дзейнасці працаўнікоў БУКП “Жылкамгас”. Даступнасць і якасць усіх камунальных паслуг забяспечваюць сапраўдныя прафесіяналы сваёй справы.

Па словах дырэктара БУКП “Жылкамгас” Віктара ІВУЛЁВА, на прадпрыемстве шмат гадоў таму зрабілі стаўку на ўмацаванне калектыўных сувязей, зладжанасць і сістэмнасць працы, і не пралічыліся. Працаўнікі арганізацыі ведаюць, што іх добрасумленныя адносіны да сваіх пасадавых абавязкаў, ініцыятыўнасць і стараннасць абавязкова будуць заўважаны.

Так, сёлета звання “Ганаровы работнік Бялыніцкага УКП “Жылкамгас” удастоіліся кантралёр ВКГ Тамара ЗАБАРОНАК, вадзіцель Валерый ДРАЧОЎ і галоўны эканаміст планава-эканамічнага аддзела Валянціна ШУТОВА. Кожны з іх прысвяціў працы на прадпрыемстве не адзін дзясятак гадоў.

– Мой працоўны стаж у арганізацыі ў лістападзе гэтага года перасягне 34 гады, – распавядае Валянціна Шутова. – Пайшлі з суседкай аплачваць камунальныя паслугі, а яна прывяла мяне ў кабінет да тадышняга начальніка жылкамгаса Іосіфа МІРКІНА. Ён прапанаваў вакантнае месца эканаміста і нават згадзіўся пачакаць, пакуль зволюся з папярэдняй працы. За столькі гадоў сэрцам і душой прырасла да калектыву і ніводнага разу не пашкадавала аб тым лёсавызначальным рашэнні.

Адзначае правільнасць выбару свайго прафесійнага шляху і галоўны інжынер жылкамгаса Мікалай КАНКЕВІЧ. Яго працоўны шлях на прадпрыемстве пачаўся ў 1998 годзе на пасадзе дыспетчара. Пасля, рухаючыся па кар’ернай лесвіцы, стараўся ўнікаць ва ўсе сферы вытворчай дзейнасці. Зараз набыты працоўны вопыт дазваляе ўкараняць у вытворчасць самыя перадавыя ініцыятывы, генератарам якіх з’яўляецца кіраўнік прадпрыемства Віктар Івулёў. Напрыклад, поўная мадэрнізацыя кацельна-цеплавой гаспадаркі. Гэта дало значны эканамічны эфект і дазволіла не згубіць якасць аказваемых паслуг па цеплазабеспячэнні.

І зараз дырэктар БУКП “Жылкамгас” і галоўны інжынер трымаюць руку на пульсе ўкаранення новых тэхналогій. Днямі дэлегацыя на чале з Мікалаем Канкевічам пабывала на спецыялізаванай выставе ў Мінску “Вада&Цяпло”, дзе знайшлі шмат карыснага, што можна ўкараніць у дзейнасць прадпрыемства.

Дзявятнаццаць гадоў шчыруе ў БУКП “Жылкамгас” Вольга МАРОЗАВА. Дзесяць з іх – галоўным бухгалтарам.

– У нас дружны працоўны калектыў, – распавядае Вольга Віктараўна. – Кожны імкнецца ўкласці ў працу частку сваёй душы, чалавека заўсёды выслухаюць, падтрымаюць у складанай сітуацыі. Да таго ж, на нашым прадпрыемстве на высокім узроўні развіта карпаратыўная культура, многа ладзіцца мерапрыемстваў для сямейнага адпачынку, нашы працаўнікі актыўна ўдзельнічаюць у раённых спартыўных спаборніцтвах.

Высокім прафесіяналізмам вылучаюцца начальнік КЦГ Мікалай ЦЫБУЛЬСКІ, начальнік участка шматгаліновых паслуг Алег СІДАРОВІЧ, аператар кацельнай Людміла КАМАРОЎСКАЯ, цясляр Віктар ПАЛОННІКАЎ, вадзіцелі Рыгор ЛЮБУШАК і Міхаіл КАЎКОЎ.

Свой уклад у стабільую і рэнтабельную працу прадпрыемства ўносяць працаўнікі ўчастка па тэхнічным абслугоўванні КВП (начальнік Вадзім КАЖЭЎНІКАЎ) і лабараторыі электрафізічных вымярэнняў (начальнік Юрый ПАЎЛЮЧЭНКА). Гэтыя службы, дарэчы, адзіныя ў раёне выконваюць важную частку работы па забеспячэнні правільнага і бяспечнага выкарыстання прыбораў уліку цяпла і вады, электрапрыбораў, манометраў…

Створаная ў 2015 годзе сертыфікаваная лабараторыя дазваляе самастойна ажыццяўляць устаноўку, зверку і рамонт уліковых прыбораў як уласных, так і старонніх карыстальнікаў. Гэта дазволіла значна скараціць затраты на абслугоўванне воднай і цеплавой гаспадарак, а прадастаўленне паслуг іншым арганізацыям – яшчэ і зарабляць грошы.

За плённую працу, уласны ўклад у развіццё прадпрыемства і ў сувязі з прафесійным святам – Днём работнікаў бытавога абслугоўвання насельніцтва і жыллёва-камунальнай гаспадаркі Вадзім Кажэўнікаў і Юрый Паўлючэнка ўзнагароджаны ганаровымі граматамі райвыканкама.

Для паспяховай дзейнасці арганізацыі стаўка робіцца на чалавечы фактар, бо многія складнікі поспеху залежаць ад людзей, якія там працуюць.

Для заахвочвання лепшых работнікаў у БУКП “Жылкамгас” прадугледжаны некалькі відаў матэрыяльнай падтрымкі. Са жніўня мінулага года прыняты яшчэ адзін від заахвочвання. Дыпломы трох ступеняў з выплатай грашовых прэмій у памеры адной (ІІІ месца), дзвюх (ІІ месца) і трох (І месца) мінімальных заработных плат уручаюцца працаўнікам за высокі прафесіяналізм, праяўлены пры выкананні сваіх абавязкаў. Сёлета восем чалавек удастоіліся дыпломаў ІІІ ступені.

  Святлана МАГІЛЕЎЧЫК.

  Фота аўтара.