Для дванаццаці юнакоў нашага раёна літаральна праз некалькі дзён пачнецца новы этап у жыцці. Ён адказны і значны для кожнага з іх, таму патрабуе ад нашых землякоў сур’ёзнага стаўлення. Гаворка ідзе пра тэрміновую службу ў войску.

Днямі ў раёне адбыўся традыцыйны Дзень прызыўніка.

З мэтай пазнаёміць маладых людзей з ранейшым вайсковым жыццём для іх была арганізавана экскурсія ў музей гісторыі Вялікай Айчыннай вайны, які размешчаны ў СШ № 2 райцэнтра. Кіраўнік яго Святлана АСАДЧАЯ правяла для будучых вайскоўцаў насычаную і пазнавальную экскурсію.

Затым для маладых людзей адбыліся ўрачыстыя праводзіны. Добрай службы пажадалі прызыўнікам начальнік аддзела ідэалагічнай работы, культуры і па справах моладзі райвыканкама Іна ІГНАТОВІЧ, ваенны камісар Бялыніцкага і Круглянскага раёнаў Мікалай ГАМОЛКА, старшыні раённага аб’яднання ветэранаў Яўген ЧАРНЯКОЎ і РА ГА “Беларускі саюз ветэранаў вайны ў    Афганістане” Віктар ПАДОЛЬСКІ, в. а. першага сакратара РК “БРСМ” Марына ШАБУСАВА.

– Сёння асаблівы дзень, і ён прысвечаны вам – тым, хто гатовы выканаць свой доўг у імя Айчыны, – звярнулася да хлопцаў Іна Ігнатовіч. – Служба ў радах Узброеных Сіл Беларусі – сапраўдная школа станаўлення маладога чалавека як мужчыны і грамадзяніна, ганаровая і адказная місія. Ад таго, як вы будзеце адносіцца да сваіх службовых абавязкаў, спасцігаць ваенную навуку, залежыць абароназдольнасць нашай краіны.

Ваенны камісар Мікалай Гамолка пажадаў прызыўнікам лёгкай і цікавай службы, упэўненасці ў сабе і сваіх сілах. Ён заклікаў рабят прадстаўляць раён толькі з лепшага боку, апраўдаць надзеі родных і блізкіх, быць годнымі звання абаронцы  Айчыны.

– Абараняючы Радзіму, ганарыцеся тым, што за вашай спінай мір і спакой цэлай дзяржавы, – дадаў ён.

Завітаў на Дзень прызыўніка і наш зямляк, вайсковец 5-ай асобнай брыгады спецыяльнага прызначэння Мікалай ЛАПО, які папоўніў шэрагі Узброеных Сіл Рэспублікі Беларусь паўгода таму.

Ён падзяліўся з будучымі салдатамі сваімі ўражаннямі аб вайсковай службе, расказаў пра ваенныя вучэнні, у якіх з вялікай цікавасцю прымае ўдзел. А таксама пажадаў ім сіл, мужнасці і ўпэўненасці ў сабе, каб тэрміновая ваенная служба пакінула пасля сябе толькі станоўчыя ўспаміны і ўражанні.

Каб падбадзёрыць будучых абаронцаў Айчыны, салісты і музычныя калектывы РЦК падарылі ім прыгожы канцэрт.

Марыя ШУТ.

Фота аўтара.

КАМЕНТАРЫЙ

Аляксандр ПШЫХОДСКІ, начальнік групы прызыву на ваенную службу райваенкамата:

– Хочацца нагадаць усім нядобрасумленным прызыўнікам пра тое, што існуе цэлы комплекс эфектыўных мерапрыемстваў, якія праводзяцца ваенным камісарыятам сумесна з РАУС і пракуратурай па прафілактыцы правапарушэнняў, звязаных з ухіленнем маладых людзей ад тэрміновай службы ў войску.

Трэба памятаць, што за гэта прадугледжана як адміністрацыйная, так і крымінальная адказнасць. Па выніках сёлетняга прызыву чатыры прызыўнікі прыцягнуты ваенным камісарыятам да адміністрацыйнай адказнасці, справы па яшчэ двух будуць перададзены ў РАУС для прыцягнення іх да крымінальнай адказнасці.

Напрыклад, восенню мінулага года бялынічанін ухіляўся ад мерапрыемстваў прызыву, за што быў прыцягнуты да крымінальнай адказнасці па арт. 435 КК РБ. У якасці пакарання яму быў прызначаны год папраўчых работ з выпрабавальным тэрмінам. У гэты прызыў “ухіліст” усё роўна папоўніць шэрагі беларускіх вайскоўцаў.

Таму можна з упэўненасцю казаць пра тое, што ўсе спробы нядобрасумленных маладых людзей ухіліцца ад тэрміновай ваеннай службы заканчваюцца для іх вялікімі непрыемнасцямі.